Riba 25 di januari, dia nacional, Aruba ta conmemora e fecha natalicio di Gilberto François ‘Betico’ Croes. Riba e dia aki nos ta para keto na e bida y e lucha di Betico Croes, cu danki na su determinacion y principalmente su amor pa Aruba, y danki na e sosten di un pueblo uni, awe nos ta biba den un pais autonomo den Reino. E lucha di Betico a inspira otro pueblonan tambe.
Betico tabata fundador y prome lider di Partido MEP na aña 1971. El a lidera nos partido te na 1986, 15 aña. Den e añanan aki Betico y MEP a lidera e lucha pa Status Aparte y a prepara Aruba y nos pueblo pa e status nobo. Betico a sa di uni nos pueblo den e lucha pa nos ideal, un pueblo liber. Betico no a cuminsa cu e lucha pa Status Aparte, pero ora el’a mira cu otronan a bandona e lucha, el’a gara e bandera, lucha y logra nos Status Aparte.
Nel Oduber, despues a lidera nos partido pa 25 aña, el’a lidera Aruba den e status nobo, pa Aruba por para riba propio forsa y a scrap e fecha di independencia pa percura cu e Status Aparte bira definitivo.
Y awor, Lider di MEP, señora Evelyn Wever-Croes, cu mes un pasion y determinacion, ta liderando nos partido pa 10 aña.
Awo cu nos ta uni, laga nos haci uzo di e forsa masal pa conhuntamente cu Movimiento Elcetoral di Pueblo, nos goberna e digno pueblo di Aruba’. E frase di Betico Croes, ta un guia pa sigui traha pa e pueblo aki siguiendo e idealnan di nos gran lider, Betico Croes.
Mi a siña hopi di nos dos lidernan di partido, Betico y Nel, y den e mesun espirito, norma, balor y idealnan, hunto cu Partido y pueblo di Aruba, nos lo sigui logra cosnan grandi pa Aruba.
Lider di MEP y nos Prome Minister, Evelyn Wever-Croes, den nomber di Partido MEP, ta desea pueblo di Aruba un ‘Felis siman di Dia di Betico’.