ORANJESTAD,Aruba
Organisacion ‘’ Ta Basta Child Abuse ‘’ a forma hunto pa asina duna forsa na e manifestacion cu ta bay tin dia 3 di julu awo. E grupo aki ta anti violencia y ta haci un apelacion na tur esnan cu ta bin pa instiga y haci drama y of pa haci destruccion , esey no ta e plan . Loke cu nos tur como arubiano mester haci ta uni hunto pa asina desmostra nos mal contento.
E grupo aki lo bay para na corte y despues cana bay parlamento. Sinembargo loke cu ta un realidad cu e organisacion cu ta atende derecho di mucha un caminda ta faya, mirando cu na momento yega corte cu juez mester tuma un decision e caso no ta yega manera desea. Loke ta un realidad cu Aruba pa hopi anja ta lucha pa e cambio na momento cu ta trata pa derecho di mucha.
Hopi ta e rumornan cu ta core rond cu un grupo cu den pasado a protesta pa contra di abuso di mucha no a keda scucha y awor den e demostracion cu ta bay tin diabierna awor posiblemente tin e intencion di bin mas agresivo y esaki no ta aceptabel pa e gruponan cu tin pensa di trece agresividad na e lucha diabierna awor.
Organisacion ‘’ Ta Basta Child Abuse ‘’ ta compronde e dolor di tur e gruponan cu tin mas cu 10 anja ta warda pa gobierno haci algo riba e situacion aki. E firmanan cu a recauda lo wordo entrega na parlamento y lo trata pa hiba e firmanan pa gobernador tambe.
Organisacion ‘’ Ta Basta Child Abuse ‘’ ta kere cu nos no por culpa solamente instancianan y gobierno , pero nos tambe como serhumano mester kibra e taboe pa stop e abusonan cu ta tumando luga. E problema di abuso di mucha ta hopi mas grandi cu solamente e instancianan, nos mester trata di wak den nos mesun cas y soluciona e problema y no tapa loke cu ta bay robes. Nos mester desenmascara e abusador y no dune mas forsa tapando situacionnan lagando e abusador haya forsa pa sigui cu e abuso y perhudica bida di varios mucha.