Aruba lamentablemente a registra su cuarto accidente fatal den trafico pa e aña 2026.
Diaranson anochi, 4 di maart 2026 pa 10:54 PM, Central di Polis a ricibi un notificacion di un accidente cu a tuma luga riba caminda di Seroe Tijshi.
Patrulla di polis, ambulancia y specialistanan di trafico a wordo despacha inmediatamente pa e sitio di e incidente. Ora cu autoridadnan a yega, nan a topa cu un auto Daihatsu Boon color silver cu tabata bolter, y un chauffeur femenino herida.
Segun e informacion preliminar, e chauffeur lo tabata intentando pasa un otro auto, pero na un momento duna el a perde control di su vehiculo, cu a resulta den e accidente.
Personal medico di ambulancia a yega na e sitio, a stabilisa e chauffeur y a transporta esaki pa hospital pa cuido medico avansa. Specialistanan di trafico despues a tuma encargo di e caso y a continua cu nan investigacion pa determina exactamente con e accidente a sosode.
Diasabra merdia, polis a ricibi notificacion di personal di hospital cu e chauffeur femenino lamentablemente a fayece como consecuencia di su heridanan.
Pa 1:00 PM, un dokter a confirma oficialmente morto di Gilliane Russiane Albert, nacida na Aruba dia 19 di mei 1998, cu tabatin 27 aña di edad.
Cu e tragedia aki, e cantidad di victimanan fatal den trafico na Aruba pa 2026 a subi na cuatro.
Cuerpo Policial Aruba ta expresa su sincero condolencianan y hopi forza na famia y sernan keri di e fayecida den e momento dificil aki.