Diabierna den oranan trempan di atardi, por a mira un cantidad di auto di departamento di husticia, entre otro unidad di cacho di polis departamento tecnico, recherche etc. E autonan a para dilanti di un cas un poco pazuid di e veld di JTL na Tanki Leendert.
Durante e entrada hudicial aki, autoridad a sali cu un cantidad grandi di saconan preto y un baki preto carga cu articulonan cu a wordo confisca for di e cas na Tanki Leendert.
Despues cu e polisnan a bandona e sitio, den careda di 6′ or y 45 di atardi polis a bolbe un biaha mas unda cu por a mira dos unidad di polis di Oranjestad cera na e cas na Tanki Leendert. E biaha aki nan a rondona e cas y tabata bati na porta. Pero aparentmente, no tabata tin niun hende na e cas aki.
Probablemente lo a drenta un informacion cu e sospechoso busca pa husticia no ta na e cas y lo ta na un adres na Alto Vista. Den careda di 7 or y 20 di anochi, polisnan a bay na un cas na Alto Vista y a detene e persona sospechoso busca pa husticia. E sospechoso a wordo transporta pa warda di Shaba.
Entrada hudicial aki lo ta relaciona cu droga. Tambe no ta descarta e posibilidad cu lo por spera mas di e entradanan hudicial aki, den e dianan nos dilanti.
