Apertura di e pista di drif tabata bunita i bon bishita tanto pa nos hendenan di Boneiro pero tambe tabata tin hopi bishitante di nos islanan ruman i te hasta turista di otro pais tabata presente. Tabata bunita pa mira con e gremio cu ta practica i bishita e deporte di drif aki tabata gosando un bol. Pabien Boneiro. Un bes mas nos a demostra cu ora nos traha hunto nos ta logra!
Pa añanan caba tur partido politico a uza e tema di un pista di drif i drag pa core campaña cune. Na 2015 MPB tambe a priminti cu lo bini cu un pista di drag. Porfin e prome fase a bira realidad caminda nos tin awor un pista di drif. E di 2 fase lo ta un pista di drag pa cua ya caba a haci desvela di un borchi pa esaki. Pa añanan diferente persona a pusha e proyecto ací. Mi tambe a wordo acerca pa yuda pusha e proyecto di drif i drag aki. Na 2021 na momento cu mi a drenta Conseho Insular e cos a cue spit.
Tin persona fuera di a bati na diferente porta te hasta a bay papia te den Conseho Insular pa e pista di drif i drag por bini pa caba. Nos a tuma e proyecto aki na serio i hunto cu Gerald Silberie ku tambe tabata miembro di Conseho Insular e tempo ei, a tene diferente reunion i a palabra ku diputado di fiansa di e tempo ei, sr Hennyson Thielman, pa pone fondo disponibel pa e pista di drif i drag. E fondo aki a haña aprobacion den Conseho Insular pa e partidonan UPB i MPB. Partidonan den oposicion a vota contra i te cu awe nan ta contra e proyecto di drif i drag aki!
Una bes cu e cen tabata riba mesa Diputado Kroon, Indebon y diferente otro persona i instancia ku semper a carga ku e deporte aki a pone cu awe Boneiro tin su pista di drif i dentro di poco supista di drag. Mi ta contento cu e deportistanan di drif i drag awor tin nan propio pista pa practica nan deporte i no mester di bay core riba caminda di Sorobon ku tur e consecuencianan di siguridad i cu polis ta na careda nan tras. Mi ta contento tambe pa e publico cu ta gusta wak e deporte akí. Awor ta importante pa nos tur cuida e pista di drif aki. Gobierno na su turno mester pone un bon plan di mantencion pa garantisa cu e pista por keda uza dia den dia afo.
Un Bes mas pabien na tur cu a yuda pusha e proyecto aki i pabien tambe na tur cu ta practica e deporte di drif i drag. Laga nos hunto sigui sostene e deporte aki. Nos a demostra cu ora nos traha hunto positivo nos ta logra!
