E barku di Marina Hulandes Zr.Ms. Groningen den un lapso cortico a detektá dos transporte di droga. Den esaki e barku a konfiská, sigun kalkulashon, 1.040 kg di kokaina.
Na kuminsamentu di yüni un avion marítimo di patruya a detektá un ‘go-fast’ (boto rápido ku motor) den laman Karibe. Siguientemente Zr.Ms. Groningen a involukrá e helikòpter MH-65 Dolphin ku ta stashoná a bordo di Wardakosta Merikano, pa asina por a lokalisá e kontakto sospechoso. No muchu despues e boto tabata visual pa e helikòpter ku a obligá e boto pa stòp. Un ratu despues a realisá un abordahe ku yudansa di un boto FRISC (embarkashon di intersepshon) ku a detené e okupantenan.
Despues di esaki e tripulashon di Zr.Ms. Groningen, djis un ratu despues di kaba ku e promé akshon, a mira un di dos ‘go-fast’. Di mes tabata bon kla ku Zr.Ms. Groningen tabata djis un par di mia nóutiko leu for di e ‘go-fast’. Pues a aktua masha rápido mes, mandando un biaha mas e helikòpter i e dos botonan FRISC (embarkashon di intersepshon) den su direkshon. Debí na e rapides di akshon e di dos ‘go-fast’ a keda detené. E sinku okupantenan di ámbos akshon ademas di e kontrabanda, a keda entregá despues na un barku di Wardakosta Merikano, pa pèrsiguishon na Estádos Unídos.
