Un proceso cu mester tabata transparente y competitivo pa suministro di gasolin, diesel y jetfuel pa Aruba ta wordo cuestiona serio door di parlamentario Endy Croes. Segun Croes , e proceso di bidding maneha pa FMSA a wordo manipula, cu decisionnan cu ta pone e credibilidad di Aruba den duda riba mercado petrolero internacional.
Segun Croes, riba 25 di juli 2025 FMSA a nombra un comision di expertonan pa inicia un proceso di bidding pa selecciona e compania cu por ofrece e miho prijs pa suministro di combustibel. E companianan a haya te 15 di augustus pa entrega nan oferta, y pa 19 di augustus tur compania cu no a cumpli cu e rekisito nan a wordo elimina oficialmente for di proceso.
Riba mesun 19 di augustus, FMSA a pidi oficialmente un best and final offer for di e companianan cu si a pasa e prome fase, entre nan Trafigura. E plaso final pa entrega e oferta nan tabata 22 di augustus.
Sinembargo, Croes indica cu despues di e etapa aki, FMSA a pidi extension repetidamente, incluyendo un extension di 15 dia riba 24 di september, cu a pasa e fecha legal stipula. Dia 3 di october, FMSA a termina e contracto existente cu CITGO, creando un plaso di solamente 90 dia pa firma un contracto nobo cu e compania cu a gana e bidding, cu suministro mester cuminsa pa prome di januari 2026.
Riba 10 di october, FMSA a pidi atrobe un extension adicional. P’e tempo aki, un desaroyo sorprendente a ocuri: dia 17 di october, e compania NOVUM, cu no a participa ni a pasa e prome fase di bidding, a entrega un oferta pa cantidad di gasolin, diesel y jetfuel, sin a pasa e proceso oficial.
Segun Croes, esaki ta representa un violacion di tur principio di licitacion publica, pasobra un compania cu no a pasa e proceso legal a drenta den e fase final di e competencia.
Mas ainda, Croes a revela cu durante un reunion riba 13 di october na FMSA, e comision di evaluacion a informa oficialmente cu Trafigura tabata e ganado di e bidding, basando riba cu nan tabata e oferta mas faborabel pa Aruba. A pesar di esaki, despues di e anuncio aki, NOVUM cu no tabata parti legal di e proceso a manda un contracto, aparentemente pa reemplasa e compania cu a gana e licitacion.
Croes ta bisa cu e manera di actuacion aki ta pone Aruba den un luz negativo den mercado petrolero internacional y ta pone na peligro e integridad y credibilidad di e pais como un socio comercial serio.
Na momento actual, Aruba no tin ningun contracto firma pa suministro di combustibel pa januari 2026, mientras cu e contracto existente ya a wordo termina riba 3 di october. Segun Croes, e confusion y mal maneho di e proceso lo tin como consecuencia un prijs mas halto pa consumidor.
Pa ilustracion, el a compara e situacion cu Corsou, caminda e prijs di gasolin ta aproximadamente ƒ1,90 pa liter, mientras cu na Aruba e prijs actual ta rond di ƒ2,21 pa liter mas o menos 30 cent mas caro.