Varios herido y panico na Dubái; proyectilnan a crusa shelo di Abu Dabi
Un oleada di atakenan atribuí na Irán a pone e region di e Golfo den estado di alerta awe diasabra, 28 februari 2026 ora proyectilnan a crusa e shelo cla di e desierto y explosionnan fuerte a sacudi diferente punto den Dubái y Abu Dabi. E incidente a kibra e imagen di trankilidad cu ta caracterisa e estado petrolero-nan di e region.
Segun testigonan, misilnan a pasa riba e shelo mientras columnanan di huma tabata subi for di basenan militar Mericano na Manama y Abu Dabi. Na Dubái, explosionnan fuerte a haci bentana di edificio halto tembla.
Dos testigo a relata cu nan a presencia un explosion na e isla artifisial The Palm Jumeirah, caminda autoridadnan a confirma cu cuater persona a keda herida. Un di e testigonan a bisa cu el a mira un columna di huma preto sali for di un hotel den e area, mientras ambulancenan tabata dirigi pa e zona.
Confirmacion di fayecimento di Lider Supremo
Na mesun dia, tanto e gobierno di Estados Unidos como e di Irán a confirma cu e Líder Supremo di Irán, Ali Khamenei, a fayece. Segun e agencia estatal di noticia Mehr News Agency, e ayatolá a muri diasabra 28 di februari 2026, memey di atakenan atribuí na Estados Unidos y Israel.
“E Lider Supremo di e Revolucion Islamico di Irán a wordo asesina na su luga di trabou, Beit Rahbari,” e agencia a publica den un comunicado oficial. Segun mesun fuente, Khamenei tabata den su oficina y tabata cumpli cu su responsabilidatnan ora e atake a sosode durante e madruga.
Operacion militar
Forsanan Mericano a confirma cu nan a hiba un operacion militar contra Irán como parti di un ofensivo hunto cu Israel, conoci como operacion “Epic Fury”, dirigi contra e Republica Islamico.
E eskaladanan di violencia aki a trece tension na nivel regional y internacional, mientras lidernan mundial ta sigui monitorea e situacion di cerca. Autoridadnan den e Emiratonan Árabes Uni a haci un yamamento pa calma y a indica cu medidanan di siguridad a wordo reforsa den diferente punto strategico.
E desaroyonan ta sigui evolucionando, y mas informacion lo wordo publica segun cada situacion cu ta desaroya.
