Awe Corte den prome instancia a cera e tratamento di e caso contra e politico A.A.H., parlamentario anterior di partido POR, y contra penningmeester di e partido aki, J.D.v.P.
Huez lo dicta sentencia riba 24 di maart venidero.
E sospechoso H. ta wordo acusa di malversacion di mas cu 190.000 florin na placa di subsidio –paga na POR for di fondonan publico- cu cooperacion di e otro acusado V.P.
Ademas H. ta wordo acusa di estafa y falsificacion.
V.P. tambe ta wordo acusa di malversacion, estafa y falsificacion.
Fiscal di husticia a exigi contra H. un castigo di prison incondicional di 24 luna y un multa.
Contra e sospechoso V.P. Ministerio Publico a exigi un castigo di trabao di 200 ora plus un castigo di prison condicional di 3 luna cu un tempo di prueba di 3 aña. Fiscal a tene cuenta cu e rol mas chikito di V.P. den e caso.
Fiscal a enfatiza den su requisitorio cu e caso aki, conoci como Diamante, no ta un caso penal comun y coriente. Den un comunidad chikito manera di esun di nos, politiconan manera H. tin un vergrootglas poni riba nan. Nan tin tambe e funcion di duna bon ehempel na tur hende. E daño cu H. a haci na comunidad di Aruba ta mucho mas grandi cu e suma di e desfalco. E ta atacha un pilar importante di democracia, esta, e confianza den gobierno. Cada ciudadano mester por confia cu politiconan ta integro y cu ta trata cuidadosamente cu placa di pueblo.
E ciudadano mester sa cu ley ta conta pa tur hende y cu politiconan corupto ta inacceptable.