For di principio Miguel Mansur a sali duro pro RAft. Esaki el a bisa den prensa, reunionan publico, y entrevistanan den prensa. Mansur a bisa cu e RAft manera cu e ta, ta excelente pa pais Aruba y cu e ta un acuerdo cu Aruba mester por biba cu ne. Segun Mansur no tin desbentaha den e Ley di Raft y cu e ta beneficia pais pasobra e ta scapa pais 30 miyon di interes pa aña. Pero Mansur ta transparente y sincero den e declaracionnan aki? Nunca e la duda den RAft? No tin nada den e Raft cu por perhudica pais Aruba?
Punto number 1 di Mansur su zienswijze:
Normanan irrealistico exigi di Aruba su presupuesto. Na Mei 20 2022, riba pagina 16 te cu 17 den e “Verslag voorstel van Rijkswet houdende regels voor het Financieel Toezicht op Aruba,” Miguel Mansur (Accion 21) a expresa den preguntanan pa Hulanda cu e no ta di acuerdo cu diferente puntonan di e Raft, y si esakinan no wordo contesta ni considera, anto e ora ey e Raft den su forma original no ta faborabel sino irrealistico pa nos pais. (pagina 16-17- verslag di Tweede Kamer Mei 2022)
Pakico e ta irrealistico segun Mansur? E ta elabora di e forma aki riba pagina 16 di e verslag; “Teniendo cuenta cu e hecho cu Raft ta pone enfasis riba e urgencia pa baha nos ratio di debe/GDP te na un 50% pa 2040, cual lo haci esaki mas sostenibel, y cu adicionalmente e ley ta exigi un 1% di surplus riba tur presupuesto, mientras nos debe/GDP-ratio actual ta mas o menos 115%, mi ta conclui cu e normanan/exigencianan aki ta probablemente inposibel pa realisa sin un refinanciamento di nos debe nacional, door di Hulanda na un tarifa/porcentahe mas preferencial. (Pag.17) Mansur ta sigui elabora cu nos debe nacional ta mas o menos 5.8 Biyon florin y ta puntra si Hulanda ta dispuesto pa refinancia esaki y den ki forma esaki lo por sucede.
Punto number 3 di Mansur su zienswijze:
Mansur ta puntra si lo por investiga si PPP-projecten por wordo re-financia pa Hulanda. Mientras Mansur ta grita cu e ta pro-RAft den prensa politicamente, su dudanan y intrankilidad fuerte ta wordo expresa den su “zienswijze” di e verslag. Claramente nos por wak Mansur Dos Cara riba e asunto aki. Na punto number 3 Mansur Dos Cara ta declara lo siguiente; Sra.Secretario di Estado ta dispuesto pa apoya Aruba, dor di investiga si e proyectonan PPP por wordo cumpra of re-financia pa Hulanda?Si di berdad Mansur ta asina convenci cu e RAft ta tremendo, con por ta cu e mes ta expresa den punto 1 y 3 cu ta practicamente imposibel pa cumpli cu tur RAft su normanan si no ta refinancia henter e debe, y ta pidi Hulanda pa yuda refinancia e proyectonan di PPP tambe?
Mansur Dos Cara
Aki nos por wak claramente e Dos Caranan di Sr. Mansur. Dos caranan di insinceridad y cu sed politico pa yega na poder hasta si esey kiermeen destrui nos pais financieramente y economicamente. Mansur a realisa hopi tempo caba cu e lo ta practicamente imposibel pa gobierno por cumpli cu tur e norma y exigencianan di e ley di RAft. E ta menciona e problemanan alarmante pero asina mes e ta sigui hunga politica cu e RAft. Kiermen, Mansur mirando e desaroyonan ta bet riba un RAft destructivo pa nos pais, ta gaña pueblo ke ta beneficioso pa Aruba y ta tapa su preocupacionnan door di sconde e “verslag” ki di 20 di Mei 2022, pasobra e no kier pa pueblo lese ni sa di dje. Dicon? Pasobra e verslag ta demostra cu Mansur ta contradeci su mes! Esaki ta e politica destructivo cu Mansur ta hibando!
Mansur, un lider Dos Cara y destructivo
Miguel Mansur aki ta conoci pa su pensamento y palabranan di destruccion. Segun Miguel Mansur, mester kita 1500 hende di e aparato gubernamental, kita overtime completo di cuerpo policial, deporta esnan cu no ta di acuerdo cu su ley di matrimonio mesun sexo y cu iglesianan mester cera nan boca y tin nan mesun partido si nan kier tin algo di bisa. Awe, Miguel ta grita cu RAft ta bon pa Aruba, sinebargo su “zienswijze” den e verslag ta bisa algo completamente diferente! Papel ta corta!
