E discusion aki ta bay hopi mas leu cu un simpel avion: e problema fundamental ta e falta continuo di transparencia di parti di e Minister.
Control parlamentario y transparencia no ta un distraccion di e problemanan di Aruba; nan ta e fundeshi di nos democracia y parti di e solucion.
Pueblo ta cansa di tende di e asunto di e private jet. Riba social media hopi ciudadano ta señala cu Aruba tin retonan hopi mas grandi pa atende: costo di bida, enseñansa, infrastructura, salubridad, siguridad y e lucha diario di nos famianan pa yega na fin di luna. Y nan tin rason: e retonan aki ta exigi atencion urgente.
Pero hustamente p’esey mester comprende e esencia di e discusion. Fraccion di MEP no ta keda papia di un avion simplemente pa papia di dje. E discusion ta continua pasobra, te cu awe, e Minister no a duna contesta completo, transparente ni verificabel riba e preguntanan crucial di integridad cu Parlamento a formula.
E diferencia ey ta fundamental: ora un mandatario wordo confronta cu pregunta di control constitucional, e responsabilidad no ta pa Parlamento stop di puntra simplemente pasobra e tema a bira incomodo pa e Minister of su sostenedonan. E responsabilidad ta keda unicamente na e Minister pa duna contesta cla, completo y verificabel pa asina e debate aki por conclui.
E solucion ta simpel: pone e documentonan riba mesa
Si tur cos ta na ordo, e solucion ta simpel:
Manipula cu mita berdad y culpa Parlamento di ripiti e mesun preguntanan no ta e caminda. Pasobra e debate aki ta bay mas leu cu un simpel avion: awe e ta un vuelo priva, mañan e por ta un destaho publico, un contrato di gobierno of un gasto cu placa di pueblo. Acepta pa keda keto ta crea un precedente peligroso pa nos estado di derecho.
Un obligacion constitucional, no un asunto personal
Democracia no ta obliga Parlamento pa scoge entre controla gobierno of atende costo di bida y e retonan social di nos pais. Parlamento mester haci tur dos pareu. Mas ainda: ora un pais ta enfrenta retonan social y financiero grandi, transparencia y control di gobierno ta bira mas importante cu nunca.
Aki no tin nada personal ni un intento pa difama. E punto ta estrictamente institucional: ken cu acepta e cargo di minister, ta acepta tambe e obligacion constitucional di duna cuenta di su actonan. Si nos crea e precedente cu Parlamento mester keda keto djis pasobra un pregunta a bira incomodo of e contestanan ta tarda, nos ta debilita e rol di control cu nos pueblo a confia nos cune.
Kende realmente tin e yabi pa sera e capitulo aki? No ta Parlamento door di stop di puntra, sino e minister door di finalmente contesta. E asunto nunca tabata un avion, sino e principio mas fundamental di nos estado di derecho: tur poder politico mester duna cuenta ora pueblo, via Parlamento, ta haci pregunta.