Camara di Comercio y Industria Aruba (KvK) ta keda boga pa tin dialogo continuo entre e stakeholders, pa asina tur partido por keda al tanto di e ultimo desaroyonan riba terenonan clave y por duna aporte pa tuma accion y logra e cambionan necesario pa Aruba por progresa. Den e cuadro aki, KvK a reuni cu Minister di Turismo, Salud y Deporte, sr. Danqui Oduber, pa scucha y intercambia idea di con lo por acelera recuperacion di nos economia y turismo y tambe a delibera riba algun aspecto di cuido medico.
Den e reunion, KvK a aplaudi y expresa su sosten pa e forma profesional con e proceso di vacuna ta canando y ta considera e vacuna como un instrumento pa acelera recuperacion di nos economia y turismo, ya cu mas lihe nos comunidad wordo vacuna, mas lihe lo reduci e riesgo di contagio di e coronavirus y consecuentemente lo por entre otro ahusta faborablemente e orario di cierre di negoshi y e toque de queda. Esaki lo crea oportunidad pa aumento di actividad comercial y benta y lo trece confiansa no solamente localmente, sino tambe pa turistanan por bolbe Aruba y sinti nan mes mas sigur y confortabel. Pa e proximo lunanan ta pronostica un crecemento den turismo, pesey ta sumamente importante pa Aruba tuma tur paso necesario pa por brinda mas seguridad y asina aumenta e fluho di turista.
KvK ta bolbe haci un apelacion na un y tur, specialmente sector priva, pa sostene y promove registracion pa vacuna. No warda pa registra pa asina Aruba por ricibi awo mas lihe y mas tanto vacuna cu ta posibel. E scenario di aumento di vacunacion, banda di e reglanan di higiena y distanciamento social, por resulta den suavisacion di e exigencianan actual cu ta dificulta biahamento y asina Aruba, principalmente comercio, por saca probecho y por tin un aumento di ingreso cu ta sumamente importante pa recuperacion di e negoshinan y tambe di nos economia. Un isla vacuna ta crea mas siguridad. KvK ta gradici Minister pa e atencion y lo keda monitor e desaroyonan di cerca.