Dia 15 di November 2023, Oficina Central di Estadistica (CBS) a cuminsa cu e Encuesta di
Entrada y Gastonan. Manera nos a menciona e Encuesta di Entrada y Gastonan ta encera 2 parti:
– Hogarnan participante lo wordo puntra pa contesta algun preguntanan tocante gastonan
cu e hogar a haci durante e 12 lunanan cu a pasa prome cu e encuesta aki
– Hogarnan participante lo wordo pidi pa yena un Buki di Gastonan Diario. Den e buki aki
tur gasto di tur miembro di e hogar mester wordo yena pa un periodo di 2 siman.
Teniendo na cuenta e esfuerzo cu un hogar mester hasi pa e encuesta aki, CBS a logra bin cu un
incentivo pa hogarnan participa. Hogarnan cu a participa completo na e encuesta aki y a duna
nan number di telefoon pa asina nan por participa pa gana un incentivo cu ta un bon di
supermercado na balor di Afl.100
CBS ta anuncia e ganadornan di periodo 9 -10 y alabes ta mantene e anonimidad di e hogarnan
ganador. E 10 hogarnan ganador pa periodo nuebe cu a tuma lugar den luna di juli/augustus 2024
ta parti den e siguiente areanan di Aruba: 4 den San Nicolas, 1 den Paradera, 2 den Santa Cruz, 2
den Oranjestad y 1 den Noord.
E 10 hogarnan ganador pa periodo dies cu a tuma lugar den luna di augustus/september 2024 ta
parti den e siguiente areanan di Aruba: 3 den Oranjestad, 3 den Santa Cruz, 1 den Savneta, 1 den
Tanki Leendert y 2 den Noord.
CBS kier a recorda tur hogar na Aruba cu ainda e Encuesta di Entrada y Gastonan 2023-2024 ta
tumando lugar den tur bario na Aruba. Ta importante pa remarca cu tur encuestador(a) di CBS tin
un badge y un uniform pa identifica nan mes debidamente. Si acaso un encuestador(a) no tin su uniform
bisti, semper e lo por identifica su mes cu su badge.
CBS a tuma contacto cu e hogarnan aki pa asina nan por busca nan bon di supermercado. Na
comienso di October 2024 lo saca e ganadornan di periodo 11 y 12. Di e manera aki CBS kier
sigui incentiva hogarnan pa coopera cu e Encuesta di Entrada & Gastonan 2023-2024.
Nos ta gradici tur hogar cu ya caba a coopera cu e Encuesta di Entrada y Gastonan y alabes ta
sigui pidi e bon cooperacion di tur hogar pa e periodonan cu falta. E exito di e encuesta di Entrada y
Gastonan 2023-2024 ta depende di e cooperacion di un y tur.
Encuesta di Entrada Gastonan 2023-2024 – Ganadornan di periodo 9 y 10
