E tension den Parlamento a escala ora cu Parlamentario di fraccion di MEP, Xiomara Maduro, a hiba palabra. Maduro a critica fuertemente cu, maske Minister Gerlien Croes a presenta den Parlamento, e no a duna e splicacionnan concreto cu tabata spera riba e desviacion di ley den e destaho publico pa material escolar.
Ante e falta di transparencia riba e tema principal, fraccion di MEP a opta pa exigi claridad riba un otro asunto cu tin atencion di comunidad: e biahe controversial di e mandatario den un avion priva cu ainda Minister Gerlien Croes no ta contesta parlamento y responde pa su responsabilidad di viahenan di trabou.
Un “insulto na inteligencia di pueblo”
Xiomara Maduro, kende mes tin un trayectoria di casi 8 aña como Minister, a splica cu durante su tempo den gobernacion e mes a biaha hopi biaha pa trabou, pero nunca den un avion priva. “Un Minister no ta haci esey, a menos cu ta un regalo of cu e mes a pagu’e y por demostra esey cu recibo.
E parlamentario a tilda e versionnan di e Minister como “contradictorio”. Maduro a señala cu e comparacion cu e mandatario a haci bistiendo e biahe como un “cena familiar” caminda no tin mester di duna recibo ta un insulto na e inteligencia di e pueblo di Aruba.
Posibel implicacionnan legal na Merca
E critica di Maduro a bay mas leu, revelando cu el a realisa su propio investigacion. Segun e parlamentario, el a consulta cu abogadonan na Merca pais caminda e avion tin su licencia pa verifica si e aeronave ey tin permiso pa cobra pa transporta pasageronan priva. E contesta tabata un “no” rotundo.
Esaki ta habri un cuestionamento legal serio:
- Si e avion no tin permiso pa cobra, Minister Croes no por a paga legalmente pa e servicio ey.
- Si el a wordo invita, mester declara esaki como un regalo.
- Sinembargo, e Minister ta keda insisti cu el a paga of a comparti gasto, loke segun Maduro por ta un declaracion castigabel bao di leynan Mericano.
Exigencia pa transparencia total
Pa e fraccion di MEP, e actitud di Minister Croes den Parlamento ta duna e impresion cu e kier sconde tras di social media en bes di enfrenta e organo legislativo cu prueba den man. Sea ta riba e destaho di material escolar cu a desvia di ley, of riba e legalidad di su biahenan personal, e exigencia ta keda mescos: transparencia total y respet pa e institucionnan democratico di nos pais, esaki ta loke e Minister Gerlien no tin, Parlamentario Xiomara Maduro ta indica.