E Conseho di Minister di Reino (Rijksministerraad) a aproba e Rijkswet di (HOFA). Pa algun hende e por parce simplemente un hecho administrativo, pero pa nos Parlamento un sorpresa amargo. Pasobra, mientras e Parlamento di Aruba ainda ta warda pa haya contesta riba nan preguntanan, e gobierno ya a enrrega e ley na Hulanda te cu Hulanda a aproba esaki caba.
Esaki no ta djis un cos chikito, sino un cuestion di principio. E Parlamento ta e organo mas halto di nos pais, y hustamente pa esey, e mester ta involucra den momentonan crucial. Specialmente pa un rijkswet cu ta impacta profundamente nos autonomia financiero y nos propio gobierno y parlamento.
Riba 4 di juli 2025, Parlamento a haya un briefing tecnico tocante HOFA. E expertonan cu a presenta no a por a contesta tur nos preguntanan pasobra esaki, segun nan, “ainda tabata na nivel administrativo.” Despues mester a cuminsa e negosacionnan riba nivel di gobierno. Pero te awe, nos no a haya claridad. Al contrario: algun siman despues, e gobierno ya tabata di acuerdo cu e rijkswet. Esey ta nifica cu Parlamento no solamente a keda sin informacion, sino tambe e rol constitucional a keda limita.
Como fraccion, nos a manda 15 pregunta por escrito na minister Mike Eman. Nos kier sa kico el’a negocia y dicon Parlamento no a wordo informa prome. Nos ta pidi transparencia: ken a negocia, ki acuerdo a yega na dje y dicon gobierno a duna e impresion riba 25 di augustus den reunion den Parlamento cu e negociacionnan tabata andando ainda, mientras e decision ya tabata plania den e Rijksministerraad!
E punto principal ta cu un rijkswet cu ta impacta nos politica financiero structuralmente, y no por a wordo entrega sin consulta of informa Parlamento. Nos Parlamento tin e derecho y e obligacion pa controla, orienta, y representa e voz di e pueblo Arubano.
Democracia ta exigi transparencia. Y transparencia ta cuminsa cu respet pa e Parlamento.