Un declaracion iresponsabel cu a causa indignacion total den e trahadornan!
E debate publico den Parlamento tocante e situacion di Korrektie Instituut Aruba (KIA) a mustra dos realidad hopi cla. Di un banda, tin un crisis alarmante den siguridad di e prizon cu mester accion inmediato; di otro banda, tin un plan pa un prizon nobo pa 2028,pero cu ainda no a wordo converti den decisionnan concreto. Parlamento no ta pidi mas reconocemento di e problemanan; Parlamento ta pidi liderazgo, claridad y un timeline cu pueblo di Aruba por conta riba dje.
Pa e motibo aki, Fraccion di MEP a presenta dos mocion crucial den sala di Parlamento pa manda e minister encarga bek pa delibera den Conseho di Minister. E meta tabata pa, cu e respaldo necesario, saca e fondonan rekeri y concretisa decisionnan inmediato pa e institucion. Sinembargo, lamentablemente, ningun di e dos mocionnan aki a wordo aproba door di Parlamento, locual ta laga e trahadornan sin e solucionnan directo cu nan tin mester e mesun siman aki.
Decepcion grandi den Minister Dowers
E trahadornan di KIA, kendenan a sigui e reunion publico aki di cerca, a keda sumamente decepciona cu e contesta di Minister Dowers. E minister a declara den Parlamento cu e solucion na e momentonan aki ta cu “mester biba cu e realidad”, un postura cu a causa indignacion y un desapunto enorme cerca e personal. E trahadornan, cu tabata spera un plan di rescate y solucionnan a corto plaso, no por acepta cu e contesta di e mandatario encarga ta pa simplemente conforma nan mes cu e situacion peligroso di cada dia.
Unda e plan di transicion pa 2026, 2027 y 2028 ta?
Fraccion di MEP a cuestiona fuertemente e falta di un plan di transicion concreto pa e proximo añanan. Maske Minister Dowers a presenta un plan structural di UNOPS pa un prizon nobo di 119 miyon dollar pa aña 2028, e realidad ta cu Aruba ta na mita di aña 2026 caba y nada a concretisa pa frena e crisis actual. Un prizon pa futuro no ta brinda proteccion na e personal cu ta subi warda awe: un estudio no ta tapa e buraconan den muraya, un vision a largo plaso no ta reemplasa un scanner cu falta, y un plan pa mañan no ta duna e departamento di K9 e auto cu nan tin mester awe pa haci nan trabou.
Condicionnan di trabou deplorabel
E denuncianan di e trahadornan di KIA tocante murayanan deteriora, areanan structuralmente debil cu ta tapa cu plywood, falta di personal y scarcedad den material mester wordo atendi urgentemente. E minister tin e deber di trece solucionnan inmediato y no por uza e pasado como refugio den Parlamento. Un gobierno no ta wordo escogi pa splica kico otronan no a haci den e ultimo shete añanan, sino pa resolve e crisisnan cu tin awo!
Cuestionamiento serio riba ‘Good Governance’
E situacion rond di e scanner di prizon, cu actualmente no ta funcionando, ta lanta interogativo serio riba e gobernacion debido. Si un “emergencia” a nace pasobra un lease a vence, un contrato no a wordo firma, facturanan a keda habri of decisionnan a wordo posponi, e ora ey nos ta papia di un emergencia administrativo cu tin un responsabilidad politico directo mara na e minister.
Fraccion di MEP a recorda cu Parlamento a exigi e minister pa entrega den un plaso di 14 dia tur documento structural rond di e scanner, incluyendo:
Besluitvorming y analisis di riesgo.
Contrato, facturanan y detayes di e proveedor.
E motibo pa e desviacion di e procedimento normal.
E planning pa su funcionamento completo.
Sinembargo, te cu dia di awe, Parlamento no a ricibi absolutamente nada di e documentacion aki.
Accion urgente pa KIA
Fraccion di MEP a conclui enfatisando cu e trahadornan di KIA no ta pidiendo luho, sino condicionnan sigur di trabou, materialnan adecua, un team di K9 debidamente ekipa, suficiente personal y e proteccion debi ora nan ta cumpli cu nan deber. Mientras cu por traha simultaneamente riba un prizon nobo pa futuro, e responsabilidad actual di Gobierno ta pa proteha e sernan humano cu ta drenta KIA tur dia.
Nan siguridad no por warda riba un anuncio mas; KIA tin mester di accion awe.