Eelyn Wever-Croes: “Un minister no por nenga di duna cuenta riba biahenan di trabou”
Den un declaracion reciente, Lider di fraccion di MEP, sra. Eelyn Wever-Croes, a trece dilanti e preocupacion di su fraccion tocante e falta di transparencia di Minister Gerlien Croes den conexion cu un biahe cu e mandatario a haci den un jet priva.
Antecedente di e caso
E cuestionamento aki ta bin for di un biahe realisa pa Minister Gerlien Croes den un jet priva ocho luna pasa. E mandatario a afirma na e tempo ey cu e mes a paga pa e biahe, y pa e motibo ey, e no tabatin e obligacion di duna cuenta na Parlamento.
Sra. Wever-Croes a enfatisa cu esaki ta inaceptabel den un contexto di gobernacion. “Ora ta trata di un biahe di trabou, transparentacion ta obligatorio,” el a declara. Segun e Ley di Integridad, un minister no mag di acepta regalo of fabornan asina cuantioso. Fraccion di MEP a solicita informacion detaya, incluyendo ken a paga, cuanto a paga, ki dia, y e lista di pashero, pero e minister a nenga di duna e informacion aki.
Procedemento via LAR
Pa loke ta e desaroyo legal di e caso, e fraccion a entrega un peticion dilanti di e tribunal (LAR) dia 26 di mei ultimo. Den e audiencia, nan a presenta nan argumentonan, y e tribunal a duna ocho siman di tempo pa duna un conseho, cu despues mester bay pa Gobierno.
Dia 10 di juli, e tribunal a informa cu e conseho a keda cla y a wordo manda pa e minister. Sinembargo, e minister no a duna e fraccion e copia di e conseho, pues nan mester a warda riba e minister mes. Ademas, e minister tin seis siman di tempo pa tuma un decision basa riba e conseho.
E punto di discusion: Integridad
Wever-Croes a recorda cu e caso ta trata di un biahe di trabou cu e minister a haci pa Corsou na november di aña pasa. E punto central di e discusion ta keda: ken a paga pa e jet priva? E minister ta mantene cu e mes a paga, pero te cu awor, no a presenta ningun prueba.
“E minister ta nenga di duna cuenta, bisando cu e mes a paga e biahe, y pa e motibo ey e no mester duna cuenta. Pero esaki no ta corecto,” sra. Wever-Croes a remarca. El a señala cu, den su funcion como minister, si e ta haci un biahe di trabou, e tin cu duna cuenta di kico e ta haci.
E fraccion ta considera esaki sumamente necesario pa e trabou di control di Parlamento. “Tin leynan di integridad cu ta prohibi un minister di ricibi regalonan di un balor cuantioso, manera un bula den un jet priva, y nos mester por controla si e minister a actua empuja cu e leynan di integridad,” asina e lider di fraccion a conclui.