Fundacion Respeta Mi & YMCA Aruba organisa un tayer pa e comunidad: Mayornan di Futuro

Abuso di mucha ta un di e problemanan social di mas grandi cu ta prevaleciendo den cada pais rond di mundo. E ta trece cu ne consecuencianan pa cu e desaroyo di e mucha riba diferente area. Pa e motibo ey, na aña 1991 a funda Fundacion Respeta Mi (FRM) pa por crea conscientisacion den comunidad di Aruba y contribui na prevencion di abuso di mucha. Stagiernan Michelmira Arends di FRM y Rosemary Bustillos di YMCA Aruba ta actualmente studiantenan di Social Work and Development cu a dicidi di haci un colaboracion pa trece dilanti un tayer titula ‘Mayornan di Futuro’ pa promove e mision di nan organisacion. Esaki cu e meta pa informa mayornan, profesionalnan y otro tocante e tiponan di abuso cu ta reconoci na Aruba y internacionalmente.

Tayer ‘Mayornan di Futuro’ E tayer di ‘Mayornan di Futuro’ a conta cu 3 sesion cu a tuma lugar riba 14, 21 y 28 di april, 2023 na e localidad di Universidad di Aruba y Fundacion Respeta Mi. E obhetivo di esaki tabata pa conscientisa y educa publico pa reconoce e señalnan y preveni esaki pa asina kibra e ciclo di abuso. A duna informacion tocante Abuso Emocional, Negligencia, Abuso no Reciente, Termento Inconsciente, Abuso Fisico, Violencia Relacional, Explotacion Criminal, Grooming, Abuso Sexual y Explotacion Sexual. Durante e sesionnan, e participantenan a practica y para keto riba nan mesun manera di criansa. Mas di 20 persona a participa activamente y a obtene un certificado di participacion riba e anochi final.

E Continuacion Michelmira Arends y Rosemary Bustillos ta sumamente contento cu e acogida y e exito di e tayer ‘Mayornan di Futuro’. E plan ta pa continua cu e tayer aki cu un maximo di 3 biaha pa aña pa sigui brinda informacion na e comunidad di Aruba pa por contribui na prevencion di abuso di mucha. E lo ta ideal pa personanan di diferente edad y districtonan di Aruba por haya e oportunidad pa participa na e tayer aki. Esaki tambe ta conta pa mayornan hoben cu por participa pa asina fortalece e crianza di cada mucha. Ta spera cu por a informa y conta cu e apoyo di e comunidad di Aruba pa cu e continuacion di e tayer aki.