Gobierno di Aruba recientemente a firma e acuerdo “United Nations Multi-Country Sustainable Development Framework (MSDCF)” pa Caribe pa e añanan 2022 te cu 2026. E Framework lo wordo utilisa pa rigi colaboracion di Nacionnan Uni den e region, incluso Aruba pa e proximo cinco añanan, sostene paisnan pa recupera y reconstrui di e pandemia di COVID-19, y tambe eherce trabounan riba tereno di desaroyo sostenibel sin laga ningun hende atras.
E firmamento a tuma luga diabierna 11 di februari door di Prome Minister di Aruba Evelyn Wever – Croes y sra. Marina Walter cu ta Resident Coordinator di Nacionnan Uni, durante un ceremonia hybrid (ceremonia virtual combina cu den persona) entre UN House na Trinidad y Tobago y Gobierno di Aruba y conseho di Minister di Aruba.
Sra. Walter a wordo acompaña pa varios miembro di UN Country Team pa felicita Gobierno di Aruba pa e contribucion substancial na e proceso di diseño di e asina yama “Cooperation Framework” y pa enforsa y continua cu lasonan cu Nacionnan Uni.
Den e ceremonia sra. Walter a bisa: “E Cooperation Framework ta representa un era nobo di cooperacion entre UN y Caribe y ta provee un fundeshi solido riba cual por sigui sostene Gobierno di Aruba den su obhetivo pa logra metanan di agenda 2030 y e Metanan Mundial pa un Desaroyo Sostenibel (SDGs). ”
Prome Minister Wever – Croes na su turno a expresa cu Aruba ta comprometi na logra e metanan di desaroyo sostenibel y ta warda cu anticipacion pa implementacion di e framework, agregando cu Gobierno di Aruba ta entusiama pa sigui den e rumbo pa bira un Pais mas resiliente.
E MSDCF ta identifica 4 aspecto cardinal como e prioridadnan pa logra desaroyo sostenibel den e region: (1) aumento di sosten pa e agenda di resiliencia economico, (2) Esfuerso mas intensivo pa sigura realisacion di derechonan humano pa un y tur, (3) gran compromiso pa aumenta inclusivdidad den reduci riesgo pa disaster y adaptacion pa cambio di clima y (4) Aumento di sosten pa sigura cu sociedadnan den Caribe ta keda sociedadnan cu paz y trankilidad ta reina.
UNDP, UNEP, UNFPA, UN Women, IOM, PAHO/WHO, UNDSS, UNIC, FAO and ILO tambe a participa na ceremonia di firmamento. Nan a felicita Gobierno di Aruba y duna nan palabra di sosten.
