Minister di Vivienda, Infrastructura, Servicio Interno y Telecomunicacion, drs. Rene Herdé, a presenta un documento nobo di maneho pa otorgamento di tereno y uzo di esaki pa construccion di vivienda. E maneho nobo ta representa un paso importante den modernisacion di e politica di vivienda, cu su meta principal ta pa crea un sistema mas husto, transparente y eficiente pa beneficio di pueblo di Aruba.
E maneho nobo a nace como contesta riba e demanda creciente di vivienda, e escasez di tereno disponibel y e necesidad pa proceduranan mas cla y transparente. Alabes, Gobierno ta reconoce cu un gran parti di e famianan Arubano ta confronta un reto financiero pa logra yega na nan propio cas, locual ta exigi un maneho adapta na e realidad actual.
Minister Herdé a enfatisa cu e vision di Gobierno ta basa riba cinco balor fundamental cu ta husticia, transparencia, vivienda pa tur, eficiencia y sostenibilidad. “Tur ciudadano merece un oportunidad husto pa logra un cas cu ta adapta na su necesidad. E maneho aki ta pone e ciudadano central y ta crea reglanan cla cu ta fortalece confiansa den Gobierno,” minister a declara.
Entre e cambionan principal di e maneho nobo ta e introduccion di un sistema mas flexibel pa uzo di tereno. Ademas di casnan individual, e maneho lo permiti mas espacio pa proyectonan residencial, apartamento y otro solucionnan di vivienda compacto, pa asina logra uzo mas eficiente di e espacio limita cu Aruba tin. Esaki lo contribui na un aumento di vivienda y un desaroyo mas moderno y sostenibel.
Gobierno tambe ta amplia e periodo pa presenta documentonan di financiamento despues di un pre-reservacion. Na luga di 30 dia, solicitantenan lo haya 60 dia pa completa e rekisitonan, esaki lo duna mas oportunidad pa logra haya financiamento sin perde nan pre-reservacion.
Pa tereno di 500 meter cuadra of menos, e maneho nobo ta cambia e criteria di construccion pa enfoka riba un superficie minimo di vivienda di 60 meter cuadra, na lugar di un porcentahe fiho di construccion. Pa tereno mas grandi, e porcentahe maximo di construccion di 30% ta wordo reduci na 20% pa promove mas area berde, un miho ambiente residencial y un uzo mas responsabel di espacio.
Como parti di e reformacion, Gobierno tambe ta introduci medidanan pa combati speculacion y pa tereno wordo uza pa negoshi. Tereno di Gobierno ta destina pa brinda un hogar na famianan Arubano y no pa comercio of ganashi financiero. Pa e motibo aki, e maneho ta inclui limitacion riba transferencia di tereno y casnan den cierto situacion, asina tambe restriccion di transferencia na personanan cu no ta residente di Aruba.
Segun Minister Herdé, e reformacion aki ta representa un cambio fundamental den manera cu Aruba lo maneha otorgamento di tereno den futuro. “Nos ta pone fin na un sistema cu no semper ta responde na e necesidad actual. Cu e maneho nobo, nos ta crea mas oportunidad pa famianan, mas transparencia di proceduranan y un uzo mas responsabel di tereno.”
Gobierno di Aruba ta invita comunidad pa conoce e cambionan introduci den e documento di maneho y ta reafirma su compromiso pa sigui traha hunto cu tur stakeholder pa logra un Aruba unda mas famia por realisa nan soño di tin un propio cas.
