Diahuebs a tuma luga un reunion virtual hopi importante entre Minister President di Aruba, Corsou, Sint Maarten y tambe Secretario di Estado sr. Raymond Knops. E tema di e reunion tabata COHO, esta e ley consenso di Reino cu Hulanda a propone pa Aruba por haya sosten di likides durante di e pandemia.
Prome Minister Evelyn Wever – Croes a splica cu te cu aworaki a haya 900 miyon florin caba na sosten di likides y a palabra cu ta bay mira si por bin cu e ley aki. Raad van State cu ta e instituto cu ta duna conseho riba leynan di Reino, a duna un conseho basta devastado riba e ley aki y di e dia ey a cuminsa negociacionnan. Actualmente ta na mesa di negociacion (Corsou y Sint Maarten tambe) pa asina haci e cambionan necesario den e ley y hacie un producto cu Aruba por acepta.
Prome Minister a enfatisa cu e negociacionnan ta duro pasobra ta trata temanan complica, pero e reunion a bay den bon ambiente y ta bayendo den bon direccion caminda cu ta mira cu Hulanda ta respeta e conseho di Raad van State cu a duna Aruba rason.
Actualmente ta casi yega finalisacion di e negociacionnan y unabes yega asina leu lo bay Parlamento y presenta e cambionan proponi pa asina Parlamento ta informa. Tambe lo informa tur gremio di con leu ta cu e negociacionnan y scucha aporte di tur.
“No ta tur ora ta di acuerdo cu otro den reunionnan, pero contal trata otro cu respet y keda na mesa den dialogo, ta yega na solucion y ta mira cu pronto lo yega na solucion pa Aruba”, Prome Minister a termina bisando.