Awe mainta e homber S. (32) a presenta dilanti Hues pa scucha su sentencia di e caso penal cu Ministerio Publico a cuminsa contra dje.
Por a compronde cu Fiscal a exigi 4 aña y 6 luna di prison pero Hues a baha e castigo pa asina haci posibel cu S. ta bay haya guia di Reclasering.
FISCAL A EXIGI 4 AÑA Y 6 LUNA DI PRISON
Tres siman pasa tratamento di e caso a tuma lugar caminda S. ta wordo acusa cu el a droga y viola un dama hoben M. (15) y a haci actonan inmoral cu M. Esaki a sosode dia 27 Februari 2025.
Fiscal a bisa Hues cu M. a bisa cu e homber S. tabata dun’e bebida alcoholico cada rato. Despues ora a baha e otro homber S. na cas, S. a sigui dun’e bebida y el a haya un blackout. Ora el a spierta e tabata den un apartamento y a sinti dolor pasobra S. tabata penetr’e cu su dede. Segun M., el a lucha cu S. y a sufri un herida na su pia. Fiscal ta haya e declaracion di M. confiabel. El a bisa Hues cu S. a admiti di tabatin relacion sexual cu M. Fiscal a mustra cu e otro homber S. a bisa cu S. a cumpra un boter di bebida fuerte pa nan bebe. Fiscal ta haya cu tin suficiente prueba di sosten. El a mustra tambe cu na Insam a haci investigacion cu ta mustra cu M. a wordo viola. Fiscal a mustra cu S. mes a bisa cu ora e tabatin relacion cu M., M. a cuminsa yora. Fiscal ta haya S. culpabel di violacion y actonan inmoral. E ta haya cu S. a droga M. pa asina abusa di dje. Fiscal a remarca cu apesar cu e otro homber S. a bisa S. cu M. tin 15 aña, S. a planea pa duna M. bebida pa asina abusa di dje. Fiscal ta haya cu S. a tacha e integridad di M. Fiscal a exigi 54 luna (4 aña y 6 luna) di prison di cual 6 luna ta condicional cu 3 aña di prueba.
CULPABEL DI DROGA Y VIOLA MUCHA
Awe mainta, Hues a bisa cu e ta haya legalmente proba cu dia 27 Februari 2025, S. a viola e mucha muher M. (15), a haci actonan inmoral cun’e y a droga e.
Hues a bisa cu e mucha muher M. a bisa Polis cu el a haya alcohol bebe for di S. y a haya blackout. Ora el a spierta el a hay’e den un cuarto y cu S. a penetr’e. Despues S. a hiba M. su cas.
M. a bay Insam na San Nicolas y dokter a constata cu M. tabata yora y tabatin herida na su rudia. M. a bisa cu el a haya esey door di a lucha cu S.
Hues a bisa cu S. a penetra cu dede y tene relacion sexual cu e mucha M. El a mustra cu S. mes a bisa cu e tabatin relacion sexual cu M.
CONDENA DI 4 AÑA DI PRISON
Pa cu e castigo, Hues a bisa cu e ta tene cuenta cu S. a duna e mucha alcohol bebe y ora e mucha a haya blackout, a tene relacion cun’e.
Hues a bisa cu S. a tacha integridad di e mucha. Esaki lo afecta e mucha pa hopi tempo.
Hues a remarca cu no ta promer biaha cu S. ta cay den man di husticia pa algo asina.
Hues a bisa cu e ta tene cuenta cu e raport di Reclasering, cu ta haya cu S. mester haya guia pa loke el a haci. Hues a splica cu segun ley, e castigo exigi pa Fiscal, 4 aña y 6 luna di prison, no ta duna lugar pa S. por haya e guia di Reclasering.
Pesey Hues a dicidi di condena S. na un castigo caminda si ta crea lugar pa Reclasering por atende cu S.
Hues a condena S. na 4 aña di prison di cual 6 luna ta condicional cu 3 aña di prueba. Durante e tempo di prueba, S. ta cay bou guia di Reclasering, caminda Reclasering lo bay guia S. pa e no comete e delito aki mas.