Den cuadro di e celebracion di e Siman di Prevencion di Candela (Fire Prevention Week) y e Dia di Bombero di Aruba, Hefe di Brandweer, Jair Tromp, a comparti e vison y e obhetivonan principal cu ta guiando e cuerpo den e etapa nobo aki.
Tromp a splica cu e celebracion di e aña aki ta combina dos elemento fundamental: e prome Open Dag den shete aña habri pa e publico general y e muchanan, y un programa deportivo-social pa e personal mes. E meta principal di e actividadnan interno aki ta pa fortalece e lasonan di companerismo despues di un periodo di retonan pa e organisacion.
“E ultimo añanan tabata añanan dificil pa e cuerpo. Dor di bini hunto y haci deporte durante un siman, nos ta purba di conecta bek cu otro pa drecha e ambiente y e organisacion mes,” Tromp a señala.
Despues di a pasa 14 aña for di Aruba, Jair Tromp a asumi e liderazgo di e departamento na fin di aña pasa cu e firme compromiso di hiba Brandweer Aruba na un nivel superior di excelencia.
“Mi a bini cu hopi motivacion y animo pa nos drecha e cuerpo y pon’e bek na unda e mester ta: un cuerpo profesional cu pueblo y nos bishitantenan por sinti orguyo di dje,” e Hefe di Brandweer a enfatisa.
Recordando su propio infancia ora un truck di bombero a bishita su scol, Tromp a reflexiona riba con e momento ey a planta e simia cu despues a converti den su vocacion profesional. El a resalta cu e trabou di bombero ta uno cu ta exigi hopi debi na e esfuerso fisico y mental, pero cu ta duna un satisfaccion enorme dor di e oportunidad di sirbi y yuda e comunidad diariamente.
Concluyendo su mensahe, Tromp a expresa su gratitud profundo na tur e trahadonan di e cuerpo pa nan didicacion diario:
“Mi ta orguyoso di ta bek cu nan y di por purba, hunto cu nan, di hiba e cuerpo na e top atrobe. Mi ta masha agradecido pa e esfuerso cu nan ta duna tur dia. Semper nos ta busca pa traha den un ambiente positivo y hunto cu e personal pa sigui mehora nos organisacion.”