Durante e recien accion cu a tuma luga den e bario di Madiki, Korpschef di Cuerpo Policial di Aruba, Ramon Arnhem, tambe tabata presente pa duna su apoyo y enfatisa e importancia di e controlnan aki. Arnhem a manda un mensahe hopi cla y directo na henter e pueblo di Aruba, haciendo un apelacion pa tur ciudadano tuma nan responsabilidad y retira autonan bandona of cu no ta funciona prome cu e team di control mes interumpi y haci esaki.
Un auto no por keda gewoon, miho bisa “sinkwido” of bandona riba tereno publico. Segun Korpschef Arnhem a splica, un auto laga atras sin atencion ta crea un mal imagen pa e bario, ta trece desorden y ta atrai mas desorden cune, afecta e siguridad y e calidad di bida di e habitantenan. E meta principal di e accionnan aki no ta simplemente pa duna boet of pa touw e vehiculonan bay cune, sino pa conscientisa comunidad y logra cu Aruba ta keda un isla limpi, ordo y sigur pa tur hende.
Ta pidi e doñonan di auto pa demostra iniciativa propio. Prome cu autoridadnan mester actua, e doño mes mester asumi e responsabilidad di kita su vehiculo for di caminda publico.Autonan cu no ta den uzo laga riba tereno publico ta genera desorden y ta crea un mal bista pa e vecindario. Autoridadnan ta duna e informacion y e oportunidad aki via di medianan di comunicacion pa asina e pueblo ta na altura y tin e chance di actua debidamente prome cu mester pasa pa accion di retira e autonan obligatoriamente.
Korpschef a expresa cu den e accionnan anterior un gran cantidad di ciudadano a reacciona positivamente y a kita nan autonan boluntariamente, cual ta e caminda corecto y e esencia di loke kier logra.
A pesar di e esfuersonan aki di conscientisacion, lamentablemente ainda tin hopi auto staciona sin ta den uzo riba via publico, motibo pa cual e ekiponan conhunto mester continua cu e trabou di touw y retira e vehiculonan aki. E yamada ta keda pa henter comunidad colabora y tene nos barionan ordena y sigur.