Cuerpo Policial Aruba (KPA) a duna un bista riba e desaroyonan di e ultimo fin di siman di campamento, destacando un contraste fuerte entre e bon comportacion di e pueblo den e areanan di recreacion y e falta di responsabilidad den trafico.
E vocero di Polis Liliana Rasmijn a informa cu, en general, e ambiente den e campamentonan tabata hopi positivo y trankil. Di San Nicolas te cu e area di Noord, e aglomeracionnan a cana den bon ordo, specialmente na areanan manera Linear Park y Bushiri.
“Nos por bisa cu e pueblo a sa di comporta su mes,” e vocero a declara.
A recorda e campadornan cu diadomingo 12 di april ta e ultimo dia pa campa, y ta pidi tur hende pa, ora nan retira, nan recoge nan pertenencianan y laga e luga limpi, mescos cu nan a hay’e.
Reto den trafico: Alcohol y Velocidad
Apesar di e ambiente den e areanan di campamento, e panorama den trafico tabata “alarmante”. KPA a reporta un cantidad halto di incidente debi na:
- Velocidad halto: Hopi manehando no a respeta e limitenan di velocidad.
- Maneha bao di influencia: E uzo di alcohol a keda identifica como un problema grave durante e fin di siman aki.
Polis a enfatisa cu nan a haci nan maximo esfuerso, hunto cu diferente departamento, pa conscientisa e comunidad via rednan social y medionan de comunicacion. Sinembargo, e mensahe no ta wordo scucha debidamente pa un parti di e poblacion.
E autoridadnan ta haci un apelacion fuerte riba e responsabilidad di cada ciudadano cu tin un rijbewijs. Maneha bao di influencia no solamente ta causa daño material, sino tambe daño fisico na personanan inocente y por resulta den perdida di e rijbewijs of castigo di prizon.
“Mundo no ta caba pa tur hende den un weekend,” e vocero a comenta, refiriendo na e desesperacion pa fiesta sin limite. KPA a confirma cu lo sigui cu controlnan estricto di trafico, specialmente banda di e playanan, pa controla papelnan na ordo, velocidad y alcohol, ya cu lamentablemente den cada control ta sigui haya hopi infraccion, pero lo sigui controla.