ORANJESTAD,Aruba
Camara di Comercio y Industria Aruba (KvK) ta duna oido na e sector priva cu a expresa nan preocupacion cu e situacion di crisis a consecuencia di e COVID-19 (Corona Virus). Hopi negoshi a tuma na serio e medidanan di Gobierno y a indica nan preocupacion pa por mantene nan negoshi riba awa. E medidanan aki tambe ta afecta e empleadonan di negoshinan mediano y chikito. E comerciantenan a trece dilanti cu nan ta hopi preocupa cu futuro di nan empleadonan.
KvK ta na altura di tur e desaroyonan aki y tambe di decisionnan cu Gobierno mester tuma. Pa cu e situacion di crisis actual, KvK ta trece dilanti algun sugerencia pa e sobrevivencia di negoshinan y tambe e problema di empleo cu por surgi:
- Empresarionan mester haci tur loke ta posibel pa mantene nan empleadonan riba payroll;
- Gobierno mester apoya empresarionan pa haci esaki;
- Gobierno mester corta nan propio salarionan y duna e placa bek na empresarionan pa paga nan empleadonan di sector priva cu e placa aki;
- Servicio di Elmar/WEB/ /Setar/ mester ta disponible liber di gasto, no posponi, gratis, te proximo aviso;
- Tur impuesto cu mester paga no mester keda posponi, sino exonera inmediatamente, asina cu empresarionan por paga e empleadonan riba nan payroll (y tene e fluho di cash moviendo), te proximo aviso;
- Gobierno mester traha duro pa haya un inyeccion di capital pa e suma cu Aruba mester pa tene economia na bida por lo menos te fin di aña, calcula a base di luna pa luna;
- E inyeccion menciona na punto 6 mester bay pa e empresarionan pa nan por paga nan empleadonan y no na cubri e gasto di payroll di Gobierno.
KvK ta na altura y ta sinti cu Gobierno ta haciendo tur cos den nan poder pa por yuda alivia e situacion, pero a compronde di e miembronan registra na KvK cu e puntonan menciona ta nan preocupacion di mas grandi. Lo por tin alrededor di 50.000 hende sin empleo, poni riba caya na Aruba cu lo mester ayudo. E personanan aki, cu ta forma parti di nos comunidad lo bay tin mester di ayudo urgente.
KvK kier termina bisando di ta dispuesto pa brinda ayudo den tur forma y unda cu ta necesario.
