Resientemente sra. Marilyn Alcalá-Wallé, outor di e buki kotisá: ‘LA PUERTA. Gekadreerd door een Ministerie.…dat met twee maten meet?’ a otorgá un ehemplar di e buki na sra. Zetsia Ponson, hefe di e departamentu Arubiana-Caribiana di Biblioteca Nacional di Aruba (BNA).
E buki ta elaborá ekstensamente riba su periodo komo Minister di Enseñansa, Siensia, Kultura i Deporte na Curaçao, su kontakto i petishonnan pa sosten na e kadena hudisial durante su periodo di Minister, su retiro i e periodo despues.
Sra. Alcalá-Wallé a sirbi su komunidat dos aña i ocho luna den e funshon pa riba un dia inesperadamente a risibi un yamada di Ministerio Publiko (OM) ku ta bai kuminsa un trayekto di investigashon penal kontra dje, pa motibu ku aparentemente e no a kumpli ku e ‘Landsverordening integriteit (kandidaat-)ministers (Screeningswet)’. Sra. Alcalá-Wallé mesora a tuma retiro sin por a komprondé e issue mesora.
Despues a resultá ku promé ku a bira Minister, ta un formulario mester a yena di otro forma, algu ku diferente Minister den e kabinete Rhuggenaath a interpretá mes kos ku sra. Alcalá-Wallé. Pero OM a skohe pa persigui unikamente sra. Alcalá-Wallé i a keda buska un aña i mei na e honan kastigabel durante su periodo komo Minister, sin por a haña algu ku ela hasi robes.
Den e buki aki, sra. Alcalá -Wallé ta laga e lektor interesá eksperensiá a base di hechos kon e kadena hudisial na Curaçao por funshoná i a funshoná p’e. I kon OM ta midi ku dos midí.
Alabes e ta duna un tremendo siñansa na e lektor! Tur esnan interesá por pasa na BNA of por tuma kontakto ku e outor pa nan propio ehemplar.