Raad van Advies siman pasa a manda un carta pa Presidente di Parlamento Marlon Sneek den cual e ta presenta su analisis di e ley di iniciativa cu ex Parlamentario Miguel Mansur di fraccion di Accion21 a presenta na 2024, relaciona cu cambionan den e ley di e proceso electoral.
Un carta cu por cierto na e altura aki ya no tin mucho validez mirando cu e plataforma politico menciona di sr Mansur, ya no tin representacion den Parlamento y adhunto tin cu observa cu e iniciativa di ley aki a wordo entrega sin sostene di un of otro fraccion den Parlamento e tempo ey y tampoco sosten di e gobierno cu tabata na mando, esta MEP-RAIZ, tempo cu esaki a wordo entrega.
Den e carta Raad van Advies na mes momento ta pone bon cla cu den cierto sentido e iniciativa di ley aki lo no mester a wordo atende mes mirando riba varios punto di exigencia cu e iniciado di e ley, no a tene su mes na dje pero asina mes e institucion a dicidi di analisa e iniciativa aki.
Practicamente riba tur aspecto di e iniciativa di ley aki, Raad van Advies a mustra su obhecion pa cu e cambionan proponi mirando cu e sistema actua di votamento, nunca a conoce un situacion conflictivo caminda por a constata cu esaki no tabata bon pa e proceso.
Al contrario ta un asunto cu ta regla den Constitucion di e pais y no ta algo cu lo por wordo cambia asina facil, si no cana e proceduranan legal existente pa asina haya sosten pa e cambio aki drenta na vigor y loke ta nifica cu lo tin cu cambia Constitucion tambe.
Entre otro e peticion pa permiti ciudadanonan di Aruba kendenan a bay biba den exterior, por ehempel na Hulanda, eherce na derecho di voto, Raad van Advies no ta mira su esaki por ta posibel mirando cu e ciudadanonan aki a ser inscribi na Hulanda como ciudadanonan Hulandes, y como tal no ta mira e necesidad pa nan wordo inclui den e proceso politico aki na Aruba.
Den e iniciativa di ley tambe sr Mansur a pidi pa introduci cambio caminda c’un politico cu tin 12 aña caba sirbiendo den un puesto publico, esta como Parlamentario, e no por bin mas na remarca pa un otro periodo tanto den parlamento como den gobierno esaki tampoco Raad van Advies ta mira un splicacion mas a fondo pa cu e cambio aki.
Kisas e parti mas importante di e “intencion politico” tras di e iniciativa di ley aki, tabata pa introduci cambio den e forma con ta reparti “restzetels mirando cu semper ta e partidonan grandi cu ta wordo beneficia dor di e sistema aki.
Mansur a trece dilanti tambe cu mester bay over na cambia e asunto di sosten di firma pa asina partidonan cu no tabatin representacion den parlamento e periodo anterior, mustra cu nan tin suficiente sosten pa por participa na un proceso electoral y aki semper e dos partidonan grandi di AVP y MEP, a motiva nan sostenedonan pa bay firma lista di partidonan chikito ya cu esaki ta yuda influencia e reparticion di restzetels.