Lions Club Aruba a realisa cu exito su proyecto anual Back to School Food Bags, un iniciativa di e Comision di Hunger Relief cu ya a bira un tradicion den e organisacion i den comunidad.
Cada aña, na luna di Juli, cartanan formal ta wordu manda na varios compania rond di isla pa pidi donacion di cuminda i bibida. Miembro di Lions ta bai buska e donacionnan ariba e dianan previamente acorda i ta wordu poni den Lion’s Den pa preparacion di e distribucion.
Durante e ultimo weekend promer cu skol cuminsa, miembro nan ta reuni den Lion’s Den pa hasi e preparacion i organisacion di tur material. Durante e weekend aki tur sacu ta wordu yena i despues distribui na miembronan di Lions cu ta reparti nan na skolnan pa mucha cu tin nesecidad. A proyecta pa e aña aki pa yena 80 saconan, pero finalmente nos a logra 50 saconan, cu apesar di e cantidad mas abou, e impacto keda hopi significativo.
E proyecto Back to School Food Bags ta keda un experiencia inspirado pa tur hende cu ta participa. Como Lions, nos ta kere cu “caring is giving”, i nos ta honra nos lema mundial: “WE SERVE.”
Aruba Lions Club ta un club di servicio cu pa casi 80 aña caba ta trahando incansablemente pa e comunidad di Aruba y ta bao di auspicio di Lions Club Internacional cu ta consisti di mas cu 46 mil club den mas di 200 pais y ta conta cu mas di 1.4 miyon miembro rond mundo y a cumpli 109 aña di existencia cu ta hacie e organisacion di servicio mas bieuw y mas grandi mundialmente.
Por ultimo Aruba Lions Club ta compromote su mes pa sigui traha hunto cu su partnernan pa yuda mehora e calidad di bida di e pueblo pa medio di su diferente programa di servicio manera esun di Hospital Bed y Wheel Chair, Smile Mobile, Feria di Salud, y otro nan.
Ta pidi pa pueblo keda pendiente pa Aruba Lions Club su siguiente actividad.
Na nomber di Aruba Lions Club nos ta gradici e cooperacion pa e publicacion
