Den e spirito di comemoracion di 30 di mei 1969, caminda pueblo y trahadornan di Corsou a lanta nan bos pa dignidad, husticia social y igualda, MAN-PIN ta enfatisa cu tur trahador tin derecho riba un ambiente di trabou sigur, saludabel y digno.
E lucha di nos trahadornan no por wordo lubida, y mester sigui refleha den ley y maneho cu ta proteha e hende, e mama, e tata y e hoben cu tur dia ta lanta bai traha di un manera digno. Pa e motibo aki, Fraccion MAN-PIN a presenta un ley di iniciativa “ARBO Corsou”, cu ta enfoca riba proteccion di trahadornan contra inseguridad fisico y mental den tur sector. E ley aki lo reemplasa e Ley di Siguridad cu ta data di 1958, cu un sistema moderno y di acuerdo cu normanan internacional di Organisacion Internacional di Labor (ILO).
MAN-PIN ta enfatisa cu tur trahador tin derecho riba un ambiente di trabou sigur, saludabel y digno. Cu e ley di iniciativa aki, ta duna un paso importante den modernisacion di derecho laboral y proteccion di trahadornan na Corsou.
E iniciativa di ley ta enfoca riba prevencion di situacionnan di peliger pa siguridad y salud di e trahador. E dunador di trabou lo tin e obligacion pa identifica riesgo sistematicamente y tuma medida pa preveni accidente na trabou, malesanan relaciona cu e trabou u profesion, y problemanan psicosocial manera burn-out y intimidacion.
E ley ta fortifica derecho di trahador, manera derecho riba informacion y entrenamento tocante siguridad na trabou. Pero tambe e derecho pa para of nenga trabou peligroso den caso di peliger serio, hunto cu proteccion contra represaya ora un trahador tuma accion pa su siguridad.
Por ultimo, e iniciativa di ley ta fortifica e control y maneho di inspeccion laboral, cu sancionnan mas severo pa violacionnan grave, pa asina percura cu e trabou ta uno digno y sigur.