E aña aki hospital a conoce diferente reto door di e pandemia, y esey sigur tabata mas ainda un empuhe pa saca e empleadonan di aña. Hunta di Directiva di Hospital a bay di acuerdo pa e aña aki nombra 2 persona como empleado di aña. Un cu ta representa e parti di cuido y otro cu ta brinda sosten na cuido. Hefenan di mayoria di departamento a propone coleganan y despues di deliberacion a dicidi pa nombra Marilu Koolman cu ta jr. beleidsmedewerker na Hospital y Ronneke Kats, kende ta zorgmanager di B-3.
Mainta trempan diferente colega a reuni en espera p’e anuncio di e empleado di aña y pa por a gar’e di sorpresa hunta di directiva cu coleganan tabata e complice di esaki. Marilu a duna di conoce cu e tabata sorprendi y ta contento p’e reconocemento. Ta traha p’e pashentnan cu ta na prome luga y no ta haci esey pa haya algo bek. Aña 2020 tabata uno cu hopi reto pa hospital, pasobra a pasa den diferente crisis di cual COVID-19 tabata uno pero no por lubida e candela na juli. Marilu ta continua bisando cu, “e parti bunita ta cu tur hende a traha duro pa bay dilanti y surpasa tur reto hunto.”
Ronneke di su banda cu no ta gusta ta den “spotlight” tabata completamente sorprendi tambe. Esaki tabata algo cu e no a spera. E ta di pensamento cu e aña aki tabata uno hopi peculiar, hopi pisa p’e departamento y henter hospital cu a topa cu algun crisis. Loke tabata special ta e team cu a keda para firme y a pone cabes hunto pa sigui bay dilanti, nan a sigui ta positivo. “Awo nos tin cu sigui bay dilanti,” el a duna di conoce. E ta spera cu tur hende recupera di COVID-19 y cu tur hende por lanta bek y mira dilanti pe futuro.
Nan tur dos ta colega nan hopi aprecia y p’esey ta merece na 2020 bira empleado di aña na Hospital. Masha pabien Marilu y Ronneke!
