Hopi Parlamentario y Ministernan no tin idea di kico realmente ta para den e Rijkswet HOFA, esey tabata riparabel durante e reunion cu tabatin den Parlamento recientemente. Parlamentario Maduro, a bisa cu na dado momento Minister di Finanzas Geoffrey Wever a te hasta indica cu e no ta sigur di kico ta para den articulo 38 di e Rijkswet. Cual ironicamente ta e articulo den cual ta entrega autonomia di Pais Aruba. Kiermen, e minister di finanzas cu ta e motor tras di locual ta e Rijkswet HOFA, no por a splica loke e ta encera, cual a laga hopi hendeincluyendo sindicatonan cu yen pregunta.
3 Hurista y ningun por splica kico articulo 38 den e Rijkswet HOFA ta encera
Segun Parlamentario Maduro ta splica articulo 38 ta encera tur locual cu ta trata maneho di presupuesto di Aruba y ley cu ta trata maneho financiero y supervision financiero, despues cu trata nan den Parlamento, na lo mester bay Hulanda. Pues Aruba no tin e ultimo palabra. Articulo 38 ta bisa esaki cla. Geoffrey, Gerlien y Mike Eman, tres hurista y ningun di e tres huristanan aki por bisa kico e articulo ta encera y cu esey ta entregamento di autonomia, mescos cu e otro Parlamentarionan di AVP y Futuro. E ta un berguensa cu Parlamento di Aruba mester a yega na e nivel di falta conocemento di nos statuto, staatregeling y e Rijkswet HOFA aki, sra. Maduro a bisa.
A puntra sra. Maduro kico ta e motibonan pa cual gobierno kier pa bin cu e Rijkswet HOFA, sra. Maduro a bisa cu gobierno su pensamento ta cu nan ta bay haya placa fia for di Hulanda, mas barata, cu Hulanda ta bay refinancia nos debenan cu nos tin den exterior, manera cu Merca y interes reduci pa e prestamo durante Covid. Sinembargo a resulta cu pa loke ta e fiansa cu Merca, no tin nada preto riba blanco, pa locual ta e prestamo haci durante Covid, e interes lo baha berdad pero ningun hende ta concentra riba con Hulanda kier pa nos page bek. Sra. Maduro ta splica cu Hulanda lo coy tur e rosea financiero di Pais Aruba, pues tur e placa di surplus y mester bay presta extra pa paga e debe aki. Pues Hulanda kier haya su debe paga na un manera hopi acelera sin worry cu Aruba tin otro debe y sin worry cu Aruba mester espacio financiero pa inverti. Esaki ta e situacion lamentabel cu Aruba ta den dje aworaki, sra. Maduro a termina bisando.