Claridad riba vuelo den jet priva, Preguntanan ta keda para mientras LAR ta duna rason na peticion pa informacion
E discusion rond di e biahe oficial di Minister Gerlien Croes den un jet priva pa Corsou ta sigui crece. Mientras e mandatario ta sostene cu e no tin ningun obligacion pa duna cuenta di su gastonan priva, instancianan formal manera e Hurisprudensia Administrativo (LAR) ta pensa un otro manera.
Den un declaracion recien riba su pagina di Facebook, Minister Gerlien Croes a opta pa shift e enfoke di e debate, sugeriendo cu Parlamento kier bay asina leu di controla con e ta gasta su salario personal. Sinembargo, e argumento aki ta pasa canto di e berdadero punto cu ta na discucion.
Ningun persona ta pidi e minister pa mustra su saldo bancario, unda e ta cumpra su paña, ni con e ta maneha su entrada personal. E pregunta central ta keda transparente y consistente: Ken a paga of facilita e vuelo den jet priva cu e a usa pa viaha Corsou den cuadro di un funcion oficial. E ta un DEBER di tur minister pa duna cuenta na parlamento di Aruba.
Un elemento critico den e caso aki ta cu e asunto a traspasa e esfera di un simpel debate politico entre partidonan. Segun informacion publico disponibel, e Hurisprudensia Administrativo (LAR) a duna un conseho claro: e informacion solicita mester keda entrega.
Den e contexto aki, e afirmacion di e minister – “mi no tin niun deber di duna nan” – ta mustra e decencia y e frescura y arogancia cu e mandatario aki tin, di pretende cu e por haci kico cu e kier cu placa di pueblo biaha pa trabou ki ora cu ta y con cu ta SIN duna cuenta na parlamento cu ta e organo cu ta controla minister nan di Aruba pa no haci mal uzo diplaca di Pais Aruba.
Un minister ta carga responsabilidad publico, y ora ta trata di ehercicio di funcion, transparencia no ta un opcion di boluntad ni tampoco un castigo, sino un DEBER democratico. Pregunta critico no ta nifica automaticamente un acusacion di corupcion, pero e deber cu e mandatario tin di bisa e berdad y no sconde esaki. Kisas cu e situacion di e vuelo den Jet priva aki e mandatario no lo ta ministeriabel mas ? kisas esaki ta su miedo y ta keda sconde ?
Pa cera e kaso aki di un forma limpi y kita tur duda, e preguntanan clave ta keda e siguiente:
• Ki dia a paga?
• Cuanto a paga ?
• Na ken a paga ?
E forma mas lihé y eficaz pa un gobernante demostra integridad ta cu e echo di duna contesta riba e puntonan aki, en bes di move e meta di e discusion pa otro direccion sin wak su mes den spiel. Claridad ta e unico caminda pa cera un caso asina.
Banda di esaki cu e tres preguntanan aki e mandatario no por contesta , kende por confia Minister Gerlien Croes cu presupuesto di Pais Aruba , maneho di Pais Aruba , negosacion nan di Pais Aruba y HOFA ?