Minister di Vivienda, Infrastructura, Servicio Interno y Telecomunicacion, Rene Herdé, a tene un encuentro amplio cu representantenan di e sector di tours pa dialoga riba e situacion actual relaciona cu acceso y rutanan alternativo pa operacion di tours na Noordoostkust.
E encuentro a conta cu un participacion grandi di representantenan di e sector, cu a yena e sala completamente. Minister Herdé tabata acompaña pa su colega, Minister di Turismo, Transporte y Labor Wendrick Cicilia, como tambe diferente consehero y representantenan di departamentonan concerni.
Durante e encuentro a duna amplio espacio na e presentenan pa expresa nan preocupacionnan, comparti nan experiencia y presenta sugerencianan pa atende e situacion. Segun Minister Herdé, e dialogo a transcuri den un ambiente habri y constructivo, cu diferente sugerencia valido cu Gobierno lo tene debidamente na cuenta den e siguiente pasonan.
Di banda di Gobierno, e ministernan y departamentonan concerni a brinda e splicacionnan posibel riba e situacion y e proceso andando. Minister Herdé a enfatisa cu prioridad ta pa busca un solucion lo mas pronto posibel, pero na mes momento haci esaki di forma responsable y cu debido atencion pa tur e interesnan envolvi.
Grupo di trabou pa sigui cu dialogo
Un resultado importante di e encuentro ta cu un grupo di representantenan di e operadornan di UTV/ATV a yega na acuerdo pa participa den un grupo di trabou, pa sigui cu e dialogo riba tur aspecto di e operacion di UTV/ATV awor y den futuro.
E intencion ta pa mantene contacto cu e sector mientras Gobierno ta sigui atende e diferente aspectonan cu ta forma parti di e situacion.
Como siguiente paso, Gobierno lo reuni dialuna awor cu Aruba Birdlife Conservation (ABC) cu e intencion di explora posibilidad pa yega na un acuerdo. Den caso cu no logra yega na un entendemento, Gobierno ta prepara pa defende su posicion den Corte y despues sigui e proceso cu e tour operators pa yega na acuerdonan concreto pa nan actividadnan.
Meta ta un solucion balansa
Minister Herdé a enfatisa cu Gobierno su meta ta pa yega na un solucion cu ta tene cuenta cu e diferente interesnan envolvi, incluyendo continuidad di e tournan, e trabou di tur e hendenan cu ta traha como tourguides, pero tambe traha den cuadro di ley y proteccion di naturalesa y medio ambiente di nos isla.
E participacion grandi y e intercambio di idea durante e encuentro a demonstra e importancia di mantene e dialogo habri.
Gobierno di Aruba ta sigui traha cu sentido di urgencia pa yega na un solucion realistico, balansa y sostenibel, cu por brinda claridad na e sector y atende debidamente e situacion actual.
