Riba 1 y 2 di februari ultimo, durante un sesion di e Comite di Nacionnan Uni di Derecho di Mucha na Geneve, Reino Hulandes a wordo evalua riba e tereno di Derecho di Mucha. E sesion aki tawata basa riba un raport di Reino entrega na Nacionnan Uni na 2020. E parti den e raport aki tawata un trabou colectivo di tur departamento miembro di Comision Derecho di Mucha bou guia di señora Olivia Croes di Departamento di Relacionan Exterior. Na su turno e Comite di experto di Nacionnan Uni ta supervisa e cumplimento cu e Tratado di Derecho di Mucha.
Un delegacion di Aruba tawata presente virtualmente na e reunion, asina formando parti di e delegacion di Reino Hulandes. E delegacion di Aruba a wordo encabesa pa Minister di Husticia y Asuntonan Social, Sr. Rocco Tjon y tawata consisti ademas di Sra. Irina Croes di Ministerio di Husticia y Asuntonan Social como tambe algun miembronan di comision Derecho di Mucha, Sra. Sacha Geerman di Departamento di Asuntonan Social, e departamento encarga pa presidi Comison Nacional Derecho di Mucha, Sra. Swinda Dumfries di Departamento di Salud Publico, Sra. Janneke Steinmann di Bureau Sostenemi y sra. Aisca Berkemeyer di Directie Voogdijraad.
Den su introduccion, Minister Tjon a informa por escrito riba e avancenan cu Aruba a haci, entre otro apertura di dos instituto residencial cu lo brinda cuido na mucha entre 6 cu 24 aña cu un inhabilidad intelectual y desaroyo y e otro tawata dirigi riba e populacion 6 aña bay ariba cu tin diferente inhabilidad. E Mandatario a accentua tambe cu mas cu 300 profesional a haya entrenamento den aplicacion di e metodo di “Signs of Safety” cu den combinacion cu e introduccion di Ley Codigo di Proteccion na april 2021 lo ekipa profesionalnan pa anda cu casonan di maltrato di mucha y traha riba nan siguridad. Asina tambe por a informa e Comite cu na juli 2020 a haci apertura di Centro Hoben y Famia cu ta ofrece sosten centralisa y ayudo trempan na mayornan y stimula desaroyo sano di hoben. Otro puntonan importante cu a comparti ta e revision di e ley cu ta regula e calidad di centro di cuido na Aruba y cu a inicia caba cu nan programa pa certifica lidernan den e centro pa asina por cumpli cu e exigencianan di calidad. Trabounan pa loke ta reenforsa maneho y capacidad di “Jeugdgezondheidszorg” na Departamento di Salud Publico y introduccion di un sistema di automatisa pa monitorea e desaroyo y bienestar di tur mucha cu ta biba na Aruba.
Banda di e introduccion por escrito Minister Tjon a contesta algun pregunta cu ta regarda e situacion di derecho di mucha na Aruba. E Comite tawata tin pregunta riba e cumplimento den ley y maneho pa cu e diferente articulonan ancra den e tratado. Asina por menciona cu Aruba a ricibi entre otro pregunta riba reconciliacion di muchanan migrante cu nan mayornan, especialmente procedente di Venezuela, tambe den ki grado tin un maneho cu ta garantisa di inclusion di e muchanan cu disabilidad cu ta residencia den e dos facilidadnan cu recien a habri. Tawata tin interes di e Comite tambe pa tende kico ta e accionnan cu tin pa combati obesidad bou di mucha y ki impacto e Centro Hoben y Famia tin te awo.
Ta bon pa menciona cu e sesion tawata reparti den dos dia, dos ora cada uno y pa motibo di e pandemia a tuma lugar di forma virtual. Awor gobierno di Aruba ta keda en espera di e recomendacionnan cu lo ricibi pronto pa sigui traha na mehora e condicionnan di tur mucha aki na Aruba. E Comision Derecho di Mucha na Aruba lo sigui traha pa promove e implementación di e Tratado. Tur e raportanan entrega na Nacionnan Uni y e consehonan ricibi den pasado ta publico y accesibel riba www.derechodimucha.org
