Recientemente Ministerio Publico a lansa e proyecto preventivo yama “Choices matter, so do you” cu a tuma luga na Universidad di Aruba. E proyecto aki ta un colaboracion extenso entre Universidad di Aruba hunto cu varios scol secundario y financia cu fondonan destina pa combati criminalidad.
Den presencia di Procurador General y varios fiscal y varios docente y studiante di Universidad, Minister di Husticia mr. drs. Arthur Dowers a duna un discurso den cual e mandatario a pone enfoke riba e rol crucial di Ministerio di Husticia pa cu siguridad na Aruba, pero tambe e rol importante di duna informacion corecto. E hecho cu PG y varios fiscal ta presente na e lansamento di e proyecto aki, ta mustra e importacia di un proyecto manera esaki. No solamente den ministerio di husticia ta sinti cu mester haci mas den prevencion di criminalidad riba Aruba, pero esey ta biba den hopi tambe den varios otro sector.
“Choices matter, so do you” ta un proyecto sumamente bunita y bon scohi pa purba envolvi e hobennan di nos comunidad pa transmiti cierto mensahenan pa otro hobennan den comunidad. Ta importante pa informacion yega su destino corectamente y sin espacio pa mal interpretacion y pesey ta importante cu e grupo di hoben aki fungi como “influencer” pa tuma e reto di trece informacion veridico sin mal informa otronan. E resultado di duna bon informacion tin impacto riba otronan y por influencia otronan pa haci lo corecto.E influencia aki no lo necesariamente wordo mira di biaha, pero den futuro un hoben cu awe a wordo influencia, lo por acerca e profesional den algun aña y comparti cu ne con e informacion duna awe, a haci un impacto positivo riba dje.
Press release: Gobierno di Aruba
