Den e último elekshon partido Demokrat (DP) i UPB a saka 3 asiento. MPB a laga e inisiativa na e dos partido nan ku a haña mas asiento pa formashon di un gobièrnu. E komishon di orientashon di MPB a risibí invitashon pa sinta ku DP i tambe ku UPB. Nos komishon di orientashon a sinta ku Partido DP promé ku esun di UPB riba djamars 21 di mart.
Durante e reunion e komishon di MPB a duna nos preferensia di kartera i akinan DP a indiká ku lo mester bai bèk den nan seno.
Durante e reunion e komishon di DP a indiká ku nan no lo papia tokante di kontenido di nada, ku si no tin eksklusividat riba mesa. E komishon a eksigui pa MPB papia ku partido demokrat so, i ku MPB no por papia ku niun otro partido. Esaki despues ku DP a hasi vários intento pa sinta ku UPB i tambe a firma un akuerdo ku M21. Pa MPB esaki no tabata un opshon, pasó nos a bisa públikamente ku nos ta pará habrí pa papia ku tur partido. E komishon di DP a indiká di no lo kier papia mas si no tin eksklusividat.
Partido MPB a sinti esaki komo un falta di igualdat den e manera ku a trata nos.
Maske ku DP tin un asiento mas ku MPB, nos ta kere ku kualke gobièrnu ku forma ku otro e mester ta abase di rèspèt mutuo i igualdat.
No opstante ku DP a eksigui eksklusividat, nos a indiká di ta dispuesto pa sigui kombersá ku DP abase di komprenshon mutuo sin eksklusividat.
Na final e dos komishonnan a kumbiní ku otro na mesa ku lo mantené “media-stilte” pero konsiderando ku e lider polítiko di DP a disidí di sali bisa kosnan ku no ta berdat públikamente nos a haña korekto pa sali aklará.
Por bisa ku e komishon di MPB a sinta ku UPB tambe i e sentimentu di tur miembro di komishon ta ku e kombersashon aki si tabata ameno i ku rèspèt mutuo.
Nos ta refutá enfátikamente na ningun momento MPB tabata tin un akuerdo trahá promé ku elekshon ku UPB, manera lder polítiko di DP ta insinuá.
Din Domacasse miembro di e komishon ta amplia:
Personalmente ami mes tabata mas inkliná pa traha ku Partido Demokrat pero di e manera ku nos a keda tratá durante e reunion mi a sinti ku no ta tuma nos komo MPB komo un opshon serio pa sinta kuné pero mas bien un “spare-tire”.
Hennyson Thielman ta bisa: despues di a evaluá e reunion ku DP i tambe esun ku UPB a reuní ku tur miembro di partido riba lista i nos a yega na e konklushon, ku nos lo sigui papia ku UPB, komo un partner igual i pa stabilidat di gobernashon pa purba yega na un akuerdo di koalishon.