Kabinete Pisas III ta violá nos Areglo di Estado i perhudiká ámtenarnan pa drecha pará di ministernan i parlamentarionan!
Frakshon MAN-PIN ta manifestá prekupashon grandi pa e manera di shòwru i no korekto ku kabinete Pisas III a filtra sèn di vakashon pa parlamentarionan i ministernan den e kambio di areglo di sèn di vakashon pa empleadonan públiko. E kabinete a purba eskivá proseduranan obligatorio ku nos Areglo di Estado ta preskribí pa oumentá sèn di vakashon di parlamentarionan i tambe di ministernan sin koseho di Raad van Advies.
Meskos ku MAN-PIN ya a pone bon kla durante tratamentu den Parlamento di e kambio di lei, e partido blou ta insisti ku oumento di sèn di vakashon di e empleado públiko ta na su lugá, pero e oumento di sèn pa vakashon pa ministernan i pa parlamentarionan mester keda parker te ora e próksimo parlamento tuma asiento na 2029.
Ta manera ku Gobièrnu ke pasa Parlamento un “fastball” dor di sluip hinka e kambio di leinan pa oumentá nan propio sen di vakashon huntu ku esun pa ambtnarnan. Gobièrnu dor di mara e 3 kambionan di lei huntu ta buta ku pa esaki pasa den Parlamento mester un mayoria di 2/3 parti di miembronan di Staten pa motibu ku Areglo di Estado ta eksigí esei den artikulo 52.
E kambio pa e “Regeling Vakantie en Vrijstelling van Dienst Ambtenaren”, ku ta benefisiá empleadonan públiko, no mester warda ya ku un mayoria di 11 ta sufisiente pa pasa e lei pa ambtenar. Den e kaso aki e kambio di e areglo di sèn di vakashon lo konta ku voto di tur hende presente den parlamento.
MAN-PIN a proponé formalmente ku e leinan riba sèn di vakashon pa ministernan i parlamentarionan keda separá for di esun di empleadonan públiko, esnan ku kontrato, “werklieden” i “gelijkgestekden”. Na mes momentu Gobièrnu por manda e leinan pa oumento di ministernan i parlamentarionan pa Raad van Advies, pa garantisá transparensia, bon gobernashon i integridat den e proseso legislativo.
Nos frakshon ta keda firme: oumento pa ministernan i parlamentarionan no por drenta na vigor den mes periodo di e Parlamento aki. Gobièrnu tin tempu sufisiente pa hasi e proseso manera ku lei ta pidi. Ademas no por subi niun benifisio pa ministernan òf parlamentarionan tanten no indeksá penshun di behes(AOV) pa nos grandinan.
MAN-PIN ta sigui wak e desaroyonan di aserka i ta pidi pa gobièrnu sigui e kaminda di klaridat, respetá e prosedura formal i pone e interés di pueblo na promé lugá.
Press release: MAN-PIN