Corte a rechasa Demanda di Renaissance riba edificio di Aduana
Den un sentencia di October 2023 den Kort Geding, corte a tuma un desicion tocante un conflicto entre Renaissance y Pais Aruba, relaciona cu benta y desaroyo di e antiguo edificio di aduana situa riba LGSmith Boulevard. E discusion tabata si e Gobierno a tene su mes na e principio di igualdad ora e a escoge pa duna e propiedad na Bohama sin usa un proseso di seleccion publico.
Esencia di e demanda: Renaissance a argumenta cu e Gobierno no a sigui un proceso di seleccion habri y cu debi na esey nan no a haña un chens husto pa presenta nan bid pa e propiedad of e derecho di erfpacht. Segun Renaissance, Bohama a wordo faboreci na e proseso, pasobra nan ta kere cu no a sigui regla “gelijkbeginsel”.
Di su banda, e Land Aruba a defende nan posicion indicando cu Bohama a ofrece un plan completo cu por cumpli cu e meta principal di Pais Aruba. Bohama no solamente ta dispuesto pa desaroya e tereno, pero tambe pa realisa un edifisio di aduana nobo den un area nobo asigna dor di Gobierno. Ademas, e desaroyo ta inclui vivienda, espacio comercial y parkeo, cu ta stimula desaroyo economico pa e area di e propiedad.
E Desicion di corte:
Corte a determina cu, den principio, Gobierno tin un obligacion pa sigui un proceso di seleccion transparante y husto, especialmente si tin mas cu un intresado. Den caso aki, tanto Renaissance como Bohama a duna nan oferta. Pero segun corte, Bohama a proba cu nan plan ta cumpli cu tur meta di Pais. Esaki ta inclui promove desaroyo economico, preveni deterioro di e tereno y realisa un oficina di aduana nobo.
Renaissance, di su banda, no a presenta prueba cu nan plan por cumpli cu tur metanan aki, ni cu nan tin capasidad finansiero pa realisa nan idea.
E sentencia
Corte a rechasa e demanda di Renaissance, argumentando cu Gobierno a actua corecto ora nan a escoge pa traha cu Bohama. A sali na cla cu Bohama ta e unico grupo cu por cumpli cu tur rekesito y meta di Gobierno.
Renaissance a ser condena pa paga gastonan di proseso di corte na e Pais y na Bohama, na suma di Afl. 1.500 pa cada un.
E sentencia aki ta proba cu tur cos a cana corecto. Algun medio atrobe ta mal informa y kier haci drama manera custumber. Claro, nan tin cu defende nan PATRON!