Featured Bonaire

Nos mes hendenan tin ku karga desaroyo di nos isla


Esaki segun e lider di M21, Daisy Coffie

Den un komunikado pa prensa e lider di M21, Daisy Coffie, ta trese lo siguiente padilanti: ‘Mi a tuma nota di nombramentu di un direktor nobo pa Bonaire International Airport – BIA. Ta trata di un hóben di 42 aña di edat. Mi no tin krítika riba nombramentu di e hóben hulandes oropeo di 42 aña di edat, ya ku mi ta kere ku e ta kualifiká pa e puesto. Loke sí mi no por uni mi mes kuné ta e maneho ku ta hiba pa loke ta trata nos hendenan lokal. Mi ta puntra mi mes si ningun di nos hendenan na Boneiru òf di un di e otro islanan di e anterior Antia Hulandes òf den eksterior no a solisitá pa e puesto aki? Dikon tempu ku sr. Michael Nicolaas, un boneriano sumamente kualifiká tabata direktor i ku tur hende tabata sa ku pa motibu di su edat, e nombramentu lo tabata temporal, no a buska un hende lokal pa kana kuné i akumulá e abilidatnan, e konosementu i eksperensia pa por a tuma over ora el a baha. Dikon no a pone un hende lokal banda di sr. Jos Hillen pa kana ku esaki pa prepar’é pa tuma over ora sr. Hillen su ora di baha yega. Si e puesto di direktor di un aeropuerto ta eksigí un nivel di estudio HBO òf universitario, dikon no a stimulá nos hóbennan pa a bai studia den e direkshon akí. Si e estudio aki lo dura 4 pa 5 aña, for di 2010 te ku awor nos lo tabatin tres periodo pa por a laga nos mes hendenan bai studia den e direkshon akí i despues traha i akumulá e abilidatnan, e konosementu i eksperensia nesesario pa awe ku orguyo un di nos mes hendenan lo por a okupá e funshon aki.’ 

Diputado tin ku aklará

‘E hóben ku awe a keda nombrá tambe a pasa den e trayekto di studia, traha pa akumulá abilidat, konosementu i eksperensia pa awe e por ta prepará pa nan a  skohé pa e puesto. Den BIA mes no tabatin hende kapasitá ku durante e temporada tras di lomba por a haña preparashon pa tuma e puesto akí? Ta preguntanan ku meresé un kontesta di e diputado responsabel i ku sigur den Konseho Insular lo e mester bin pa duna kuenta i rason. Un speransa ta keda mi. Mi ta spera ku nombramentu di e hóben hulandes oropeo akí no ta pa tempu indefiní. Pasobra si esei ta e kaso, esaki lo nifiká ku pa e próksimo 23 aña, asumiendo ku su edat di penshun ta minimalmente 65 aña, e puesto aki lo no ta disponibel pa nos hendenan lokal’, segun opservashon di Daisy Coffie. 

Nos mester tuma e rienda den nos propio man.

Terminando Daisy Coffie ta enfatisá: ‘Mi ta spera ku e maneho den BIA ta ku e hóben akí ta haña un konvenio di trabou di entre 3 pa 5 aña i ku a pone e kondishon ku lo pone banda di dje un di nos mes hendenan ku lo kana kuné pa akumulá e abilidatnan, konosementu i eksperensia nesesario pa ora su konvenio di trabou terminá nos lo tin nos propio hendenan bon prepará  pa okupá e puesto akí. E maneho akí no solamente mester konta pa e puesto di direktor den BIA sino pa tur otro kompania di gobièrnu i pa gobièrnu su direktoradonan mes tambe. Ta inakseptabel ku nos ta krea puestonan klave pa hendenan di afó i nos mes profeshonalnan tin ku para na banda i mira ku nan a keda ekskluí. Simplemente esaki no por. E maneho mester kambia fundamentalmente. Desaroyo di nos isla mester ta kargá primeramente pa nos mes hendenan. Temporalmente, esta tanten ku nos mes no tin, nos por haña yudansa di pafó, pero e meta semper mester ta ku nos mester tuma e rienda den nos propio man. Ta esaki M21 ta para p’e i ta esaki ta hasi nos diferente.’

Related posts

Pastor marcel balootje: Bo rabia, por destrui bo mes y bo famia.

EA News Author

Exitoso conferencia virtual di aruba meets europe

EA News Author

Ultimo dia di inscripcion pa Landsexamen mavo/havo/vwo 2022

EA News Author

Leave a Comment