Na kaminda pa Konmemorashon di Pasado di Sklabitut dia 1 di yüli 2026, e grupo di trabou 1 di yüli di Entidat Públiko Boneiru, den kolaborashon ku e partner lokal Mangazina di Rei, durante henter luna di yüni ta organisá Luna di Emansipashon. Ku esaki luna di yüni na Boneiru ta den signo di un seri di aktividat, na unda ta para ketu na temanan manera libertat, rèspèt propio, konsientisashon i konektividat kultural.
Luna di yüni no ta solamente den signo di konmemorashon di abolishon di sklabitut dia 1 di yüli 1863, pero prinsipalmente tambe di e proseso mas amplio di emansipashon: fortifikashon di derecho, oportunidat igual i kapasidat pa realmente hasi uso di e oportunidatnan akí den nos komunidat di awendia.
Pa e motibu akí e lema di Luna di Emansipashon ta:
Nos pasado, nos herensia
Nos futuro, nos obra
Pasado di sklabitut ta keda un komponente importante di nos historia i identidat konhunto. Pa medio di para ketu na e pasado akí i e impakto ku e tin riba nos presente, ta surgi espasio pa konsientisashon, diálogo i mas emansipashon. Na mes momentu e ta ofresé oportunidat pa huntu konstruí un futuro kaminda rèspèt propio, konekshon i oportunidat igual ta sentral.
Ku Luna di Emansipashon, Entidat Públiko Boneiru huntu ku organisashonnan sosial i kultural ke krea espasio pa enkuentro, diálogo i reflekshon. A base di tres pilá sentral di e programa di Mangazina di Rei – Marka, Remarká i Remarkabel –, durante luna di yüni nan ta organisá vários aktividat pa komunidat di Boneiru.
Marka ta den signo di konsientisashon di e historia i e impakto di pasado di sklabitut i di e patrimonio boneriano.
Remarká ta invitá pa wak ku un otro bista den direkshon di loke a pasa, i kua impakto esaki tin awe ainda den nos komunidat.
Remarkabel ta enfoká riba kresementu i transformashon: no djis pasa doló i rabia siegamente pa otro, pero netamente kompartimentu di lès, eksperansia i forsa pa huntu sigui traha pa un mihó futuro.
E aktividatnan ta konektá ku e Agènda di Akshon Pasado di Sklabitut Boneiru di Entidat Públiko Boneiru, den kua ta enfoká riba konsientisashon, edukashon, patrimonio, kultura i restorashon dirigí riba futuro.
Por haña e kalènder i mas informashon tokante e aktividatnan riba wèpsait di Entidat Públiko Boneiru, https://bonairegov.com/pa/luna-di-emansipashon. Tene e wèpsait akí i e página di Facebook di Entidat Públiko Boneiru na bista, pasobra den e próksimo dianan regularmente nos lo duna aktualisashon tokante tur aktividat durante e Luna di Emansipashon.
