Detenshon despues di ladronisia for di kas
Djárason 23 di aprel, alrededor di 6.20 or di atardi, a detené un hòmber di inisial H.E.V. di 39 aña di edat na Kaya Dradu pa ladronisia for di kas. E detenshon a tuma lugá despues ku mas trempan riba e dia, a drenta keho di ladronisia for di un kas na Kaya Amalia. E sospechso a drenta e kas i a bai ku vários aparato elektróniko i diferente prenda.
A rekonosé e sospechoso riba imágennan di kámara despues di kua a detené. Ademas, a hasi un entrada hudisial i a konfiská outo di e sospechoso. Tambe a konfiská diferente artíkulo ku ta relevante pa e investigashon. Investigashon den e kaso ta kontinuá.
Disfrutá, pero bebe na midí
Atrobe ta wikènt. KPCN ke avisá pa konsumí alkohòl ku límite si bo ta partisipá den tráfiko. Asina bo ta prevení situashonnan fèrfelu pa bo mes i pa otronan. Ta prohibí pa partisipá den tráfiko si bo a konsumí mas ku e kantidat máksimo permití. Si bo mester bai warda i ta haña un but ta dependé di e resultado di e tèst di supla.
Tèst di supla
Ku un tèst di suplá polis ta kontrolá si bo ta bou di influensia di alkohòl. Bo ta obligá di partisipá na e tèst di supla. E tèst aki ta mustra si bo a bebe mas ku ta permití pa lei. Resultado di e tèst aki ta determiná si bo mester bai warda investigashon mas aleu. Bo ta nenga di hasi e tèst? E ora ei bo ta haña un prosèsferbal. Dependiendo di e resultado di e tèst di supla bo mester bai warda di polis pa un análisis di rosea. Durante e investigashon aki polis ta midi presis kuantu alkohòl bo a konsumí ku un aparato spesial.
Bo ta manehá bou d influensia di alkohòl? E ora ei bo ta haña un but, un prohibishon (temporal) pa manehá, un kastigu di prisòn òf un kombinashon di e kastigunan aki. E peso di e kastigu ta dependé di e seriedat di e situashon. Bo ta involukrá den un aksidente? E ora ei ta tèst bo mas lihé pa konsumo di alkohòl ku durante di un kòntròl rutinario.
Mi ta kastigabel si mi ta fuma komo peaton?
Esaki ta posibel. Polis por duna un prosèsferbal pa buracheria públiko. Polis a topa bo den estado burachi? E ora ei polis ta uza bo aparensia di buracheria i bo aktitut. E ora ei no ta hasi un tèst di supla.