Ayera mainta nuebe trahador nobo di Wardakosta a risibí nan diploma di akademia di polis i
nan sertifikado di Wardakosta for di man di ‘Plaatsvervangend Directeur van de Kustwacht’,
señor Eugene Middelhof i hefe di tim di Karibe di e Akademia di Polis na Hulanda, señor Rob
Appelhof. E diploma i e sertifikado a ser entregá durante un seremonia den presensia di algun
miembro di famia i un selekshon chiki di e staf di Wardakosta. Pa motibu di e medidanan di
corona aktual a tene un seremonia simpel i bunita pa e hòbennan.
E aspirantenan a kuminsa na mart di 2018 na e ‘Opleiding Caribische Politie en Kustwacht
(OCPK). OCPK ta e estudio anterior ku a bira ‘Basis Opleiding Kustwacht’. E aspirantenan aki a
kuminsa nan estudio di OCPK na 2018 huntu ku otro studiantenan di Korps Politie Caribisch
Nederland (KPCN). E grupo di aspirante komo tim a enfrentá retonan fisiko, mental i teorétiko.
Despues di terminá e estudio na e akademia di polis e aspirantenan di Wardakosta a sigui un
periodo pa nan siña e modulo nóutiko kual ta siña nan e parti di nabegashon, aborda un boto i
‘natte wetgeving’. Durante di e seremonia, hefe di e tim di Karibe di e Akademia di Polis na
Hulanda, señor Rob Appelhof a hiba un spich bisando; “mi ta orguyoso di boso tur. Mi a mira
boso krese i desaroya boso mes apesar di retonan i momentunan di duda. Mashá pabien ku
boso diploma”. ‘Plaatsvervangend Directeur van de Kustwacht’, señor Eugene Middelhof tambe
a hiba palabra di felisitashon na e trahadornan nobo; “Awe ta un dia speshal pa Wardakosta i
bosonan. Wardakosta su puntonan di sosten ta haña trahadornan nobo, di kual kuater lo
kuminsa na Aruba su punto di sosten, tres lo kuminsa na Kòrsou i dos lo kuminsa na Sint
Maarten. Awe un kapítulo nobo tei kuminsa den boso bida! Boso ta bai hasi e timnan na e
puntonan di sosten di Wardakosta mas fuerte, pero korda tambe pa boso siña di boso
koleganan. Mashá pabien i eksito ku e trabounan!
E aspiranten a traha duru pa dos aña largu pa por logra nan meta. Awor despues di keda hopi
tempu leu for di kas i for di nan famia, nan a logra. E trahadornan nobo lo kuminsa laborá pa
Wardakosta den yanüari 2021 na e diferente puntonan di sosten. Pabien i tur kos bon.
