Durante luna di sèptèmber, Tourism Corporation Bonaire (TCB) a rekonosé nuebe persona komo Embahador di Boneiru den kategoria di bròns, plata i platina.
Den kategoria di bròns a rekonosé Sabrina i Wendy Ijsenbout di Hulanda pa nan respektivamente 10 i 12 aña di bishita na Boneiru, miéntras Glen Medina di Merka a risibí esaki pa e 11 aña ku e ta bishitá nos isla.
Den kategoria di plata a rekonosé Joop de Neef pa 16 aña, Jos Verburgt 17 aña, Frank van der Harst i Bram Ijsenbout pa 18 aña di bishita na nos isla. Tur ta prosedente di Hulanda. E pareha Johnny i Susan Larsen di Merka a risibí e distinshon di mas haltu, kual ta esun di platina pa nan di 32 aña bishitando Boneiru.
Helen Mercera di TCB tabata enkargá ku e seremonia di rekonosementu i tambe entrega di e fenetanan korespondiente den e diferente kategorianan.
