E direktiva di Fundashon Komité di Konmemorashon Pasado di Sklabitut ta anunsiá
ku entrante 1 di mei 2026, sr. Paulo Martina lo asumí e funshon di direktor di e
organisashon.
Astrid Elburg, presidente di e Komité di Konmemorashon Pasado di Sklabitut: “Paulo
Martina ta un persona ku, meskos ku sobrá di nos tim, ta un eksperto i sumamente
kompetente. Banda di esei, e ta dirigí riba solushon i ta kompartí nos vishon di tantu
e realidat aktual komo e futuro.”
Paulo Martina a nanse na Kòrsou na 1964 i a muda pa Hulanda ora e tabatin 12 aña.
Ya pa 30 aña e ta traha den sektor di arte i kultura i for di 2023 e ta direktor di e
Musea Zutphen. Tambe e ta presentadó di e programa di televishon Nu te Zien!
Promé ku esei Martina tabata direktor di Museo van Bommel van Dam na Venlo pa 4
aña i pa 10 aña e tabata direktor di Museo Dr8888 na Drachten. Tambe e tin
eksperensia amplio den funshonnan di konseho i maneho den e sektor kultural, entre
otro komo konsehero di e fundashon Boekman i komo miembro di e komishon di
konseho Kunstraad Groningen.
Paulo Martina: “Pa motibu di mi propio orígen, mi ta sinti un konekshon intrínseko ku
e historia di sklabitut. Esaki ta hasi mi èkstra motivá pa usa mi konosementu i
eksperensia pa e Komité di Konmemorashon Pasado di Sklabitut. Pa motibu di mi
raisnan, mi ta profundamente konektá ku e hendenan i e tópiko.”
Martina su kredo ta ku tur hende tin derecho di konosé nan mes historia. Un historia
ku kua bo por identifiká, ku ta yuda bo komprondé bo mes, otronan i bo alrededor
mihó. Konsientisashon ta klave den esaki.
“E historia di sklabitut ta parti di nos historia kompartí. Dor di konsientisashon tokante
di e pasado kompartí aki, bo ta traha pa sanashon den presente i bo ta hasi un futuro
kompartí posibel. Dor di stimulá investigashon, edukashon i diálogo tokante e historia
di sklabitut, bo ta oumentá e konsientisashon di sosiedat tokante di su impakto.
Skucha kuidadosamente ta un rekisito pa por kolabora ku komunidatnan afektá i
organisashonnan sosial denter di Reino Hulandes i Sürnam. Mi ta ansioso pa traha
ku tur e komiténan lokal, Ninsee, e Museo Nashonal di Sklabitut, i gobièrnu
nashonal. Manera Astrid Elburg, presidente di e komishon, ta bisa: “Skouder na
skouder, nos ta trahando pa un futuro resiliente.”