ORANJESTAD,Aruba
Parlamentario Alan Howell ta sumamente contento di por tabata participle den e gran logro pa poblacion di Aruba ora cu diaranson 9 di september 2020 e ley di Ombudsman (Defensor di Pueblo) a wordo aproba unanimamente pa Parlamento.
Ta trata di un ley cu a cuminsa hopi aña atras y a pasa den diferente constelacion parlamentario y finalmente a mira lus di dia na awo na september 2020. E ta un ley cu lo garantisa un trato husto y un bon servicio na nos comunidad for di departamentonan di Gobierno y fundacionnan.
Hopi biaha por scucha e ciudadanonan keha di servicio of cu mester warda añanan pa haya un
contesta riba un peticion of ta sinti cu e maneho pa cu nan no ta uno husto. Awo cu lo bin cu e Defensor di Pueblo, el lo tin pa medio di ley tur e hermentnan necesario pa den nomber di e
ciudadano haci su investigacion, drenta e departamento(nan) gubernamental, haya tur e informacion y pone
hendenan responsabel caminda cu no ta cumpli cu e ley of ta wordo trata inhusto.
E Defensor di Pueblo mester ta un persona capacita y cu na un forma imparcial tin cu bay atende
cu e preocupacionnan den nos comunidad y haci investigacionnan. E persona aki mester haci tur lo posibel pa percura pa nos pueblo haya un servicio mas husto posibel, cu su peticionnan
cana na e miho forma posibel y haya oido di e departamentonan manera debe ser.
Howell ta indica cu awor nos ciudadanonan lo bay haya un organo imparcial y husto cu lo tin oido pa nan preocupacionnan, kehonan y criticanan y percura pa e procesonan sigui e camindanan corecto.
Awo e proceso pa busca y nombra e persona indica pa bira Defensor di Pueblo ta cuminsa y ta spera cu e por bay mas lihe cu ta posibel, naturalmente teniendo na cuenta cu e persona mester cumpli cu tur e rekisitonan y cualidadnan necesario oa e funcion.
Parlamentario di POR ta gradici cada persona cu pa añanan largo a traha riba e ley aki y ta felicita pueblo di Aruba cu finalmente a logra e ley di Defensor di Pueblo.