Plan di comberti debe di Covd-19 den un fondo di desaroyo a wordo presenta na gobierno di Hulanda mas di 3 aña pasa pa gabinete actual!
Den e ultimo dos luna nos por a scucha Mike Eman papiando y biahando rond cu un plan pa comberti e debe di Covid-19 den un fondo pa desaroyo di Aruba. E plan aki a wordo rechasa Dialuna anochi hasta pa 3 miembro di oposicion! Asina mi por a scucha sr.Mike Eman den un rueda di prensa den cual e la gaña cu “e no por compronde pakico partidonan MEP, MAS, y un parlamentario independiente a vota contra su mocion den cual su plan tabata describi. Tur esaki pueblo por scucha den e ultimo reunion publico di Dialuna atardi pa anochi December 18 2023 riba e plataforma di facebook di Parlamento di Aruba.
Gobierno a negocia y presenta un plan similar na Raymond Knops 3+ aña pasa na 2020.
Mike Eman a pensa riba un plan, a core bai Hulanda, a hunga politica na Corsow, a haci yen di fanfaria aki na Aruba, pa un plan cu ya e ekipo dinamico Arubano di gabinete Wever-Croes a yega di negocia cu Hulanda. Esaki a sucede mas di 3 aña pasa na 2020, ora gobierno di Aruba a propone pa conberti e debe den un fondo di desaroyo. Raymond Knops Secretario di Estado a mira un posibilidad e tempo ya, sinembargo esaki a wordo bari eventualmente for di mesa y Hulanda no kier a papia mas di e proposicion.
Mike Eman tabata e unico lider di fraccion cu a nenga yamada di gobierno pa atende un reunion importante durante e pandemia di Covid-19.
No ta nada straño cu Mike Eman ta core cu un plan cu ta mas cu 3 aña bieuw cu gobierno a propone na Hulanda na 2020, pasobra durante di e pandemia Mike Eman tabata totalmente desapareci y scondi den su condominium. Gobierno a yama tur lider di fraccion den tempo di Covid, pa sinta hunto y duna ideanan con pa acapara cu e situacion di crisis! Mientras tur otro lider politico a sinta cu gobierno y por a wak e gravedad di e situacion, Mike Eman den su orguyo a rechasa e yamado importante aki. Esaki ta e actitud di e “Bon Comun” cu Mike ta papia di dje?
Benny y Dowers a nenga di sostene e mocion di Mike Eman.
Mientras cu Mike Eman mes tabata core riba bao, biaha pa Hulanda, Corsow y den reunion publico aki na Aruba, Benny y Dowers conociendo e plan di Mike, a dicidi di bai cu vacantie na Hulanda pa bai hunga den sneeuw. Esaki por ta un otro kiebro di confiansa den AVP? Parlamento di Aruba a informa tur parlamentario tempran cu recess (vacantie) di Parlamento lo cuminsa Diaranson 20 di December y ni un dia prome. Tur 21 Parlamentario tabata sa cu mester a pasa 3 ley importante ainda prome cu final di e aña 2023. Den otro palabra, Benny y Dowers cu tabata tey ne prome reunionan, a bai riba un fecha net pa no sostene e mocion di Mike Eman. Esaki no ta nada nobo, pasobra e unico cu ta papia di e plan aki ta Mike. Ba yega di tende Dowers y Benny papia di e plan di Mike?
Marisol a bisa Mike Eman den su cara: Bo mocion ta irrealistico!
Marisol Lopez-Tromp lider di fraccion di MAS a bisa publicamente cu Mike Eman su plan tabata irrealistico. E la bise den Parlamento y den un rueda di prensa despues. Mi a scuche bisa Mike Eman den gang tambe. Pero Mike ta bai den entrevista cerca su prensa faborito y ta bisa cu e no ta compronde pakico MEP, Rycond y MAS no ta di acuerdo. Cu of sin Benny y Dowers e mocion aki a wordo rechasa cu un gran mayoria di Parlamento!
Den conclusion esaki ta keda e realidad; Mike Eman papiando di “Bon Comun” te ainda no por refleha ningun “sentido comun.” E realidad ta cu Mike Eman y AVP a celebra corupcion, tin ex-minister cera den KIA, parlamentario condena, partido kibra, dos Parlamentario cu “no a give a damn” pa sostene e mocion fracasa di nan lider y a prefera di bai hunga den sneeuw enbes di haci nan trabao den Parlamento.
Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!