Parlamentario Xiomara Maduro ta cuestiona Minister Gerlien Croes, kende kier convence Pueblo cu mas control via HOFA ta necesario pa maneha finansa publico, mientras cu e mes no ta mustra respet pa e instancianan di control cu ya tin na Aruba
Na Aruba tin control
“Control no ta solamente crea mas regla, mas instancia of laga otro controla nos. Control ta ora bo percura pa nos mesun instancianan, manera Parlamento, Algemene Rekenkamer y LAR, ta fuerte, independiente y por haci nan trabou,” e Parlamentario a expresa.
Minister no ta respeta control
LAR ta un di e instancianan cu ta yuda tene e balansa den gobernacion. E ta existi pa percura cu Gobierno y minister ta actua conforme ley, y cu ciudadano por cuestiona decisionnan di Gobierno. Dia 10 di juli, LAR a emiti su conseho den e caso relaciona cu e biahe oficial di Minister Gerlien Croes den avion priva. Awe ta 28 di augustus y nada cu e mandatario ta brinda claridad den e caso conoci como Jetlien. E Minister no ta respeta e control di LAR. Ainda Minister no a duna e transparencia cu e caso aki ta exigi. Ainda Parlamento no a haya e claridad cu ta pidi. Ainda Pueblo no a mira e pruebanan relaciona cu e pago di e biahe.
Minister kier control di HOFA
Nos ta tende e mesun Minister papia di control, disciplina y e necesidad di introduci HOFA pa controla finansa publico. Pa Parlamentario Xiomara Maduro, e pregunta ta simpel: Con bo por pidi mas control di afo, mientras bo no ta respeta y fortalece e mecanismonan di control cu nos mes tin na Aruba?
Si Minister Croes ta kere den bon gobernacion, e mester cuminsa mustra esaki na practica: respeta LAR su conseho, duna cuenta na Parlamento y comparti cu Pueblo e informacion cu ta wordo pidi.
Bon gobernacion no ta un slogan
Transparencia no ta algo cu bo aplica solamente ora e ta conveniente. Y control no ta algo cu bo por bende na Pueblo, mientras bo ta ignora e instancianan cu ta existi pa controla Gobierno. “Control ta cuminsa na cas. Fortalece nos institucionnan. Respeta nan trabou.
Duna Parlamento cuenta, y bisa Pueblo e berdad,” ta e mensahe cu Parlamentario Xiomara Maduro kier enfatisa.