Diaranson atardi, for di Cede di MEP, Lider di MEP, señora Evelyn Wever-Croes a informa riba e actividadnan di partido. Partido Movimento Electoral di Pueblo MEP ta preparando full swing pa campaña 2025. Pa esaki Partido MEP ta organisa un rifa pa recauda fondo. Ticket lo ta Awg 5 solamente. Lo tin 5 premio cash cu e maximo di Awg 10 mil. Sorteo lo ta dia 30 di october durante un actividad ameno riba un diadomingo atardi na unda cu full famia por participa.
Recaudacion di fondo pa nos partido ta hopi importante pasobra partido MEP ta di pueblo y pa pueblo. Nos fondonan pa campaña semper ta donacionnan di ciudadanonan manera abo. Nos ta preparando caba e candidatonan nobo y esnan cu tin caba pa ta cla pa ora campaña di porta pa porta cuminsa. Tambe nos ta drentando barionan pa nos por scucha kico ta biba den nos comunidad.
Hunto cu partido MEP, tin tambe Fundacion Ing. Cesar Terzano, cu ta e hala scientifico di nos Partido, y e Fundacion Formacion Politico Nelson Orlando Oduber cu ta trahando riba e formacion politico di nos politiconan. E hala femenino di nos Partido, Forsa Femenino Grace, ta e forsa di e hende muhenan den nos Partido. E hala hubenil cu ta HOT, e Hubentud, Orguyoso Talentoso ta buscando miembronan nobo tambe. Tur e organisacionnan aki hunto lo ta presente dia 30 di october na e actividad.
“Nos ta bati na bo porta un biaha mas, ciudadano di nos pais, sostenedor di nos Partido, pa yuda nos cu e atividad pa recauda fondo aki. Pa un contribucion di Awg 5 pa ticket, bo por gana te Awg 10 mil. Nos ta conta cu bo contribucion”, Lider di MEP a expresa.