Ora nos ta biba bon cu otro, especialmente den nos famia, den nos hogar nos ta duna honor na Senjor, pasobra Senjor ta manda nos pa stima otro. ( Hebreonan 12:14).
Materialismo a pone cu hende ta stima placa mas cu Dios, y den mesun rosea ta stima placa mas cu hende, y nos por tuma nota cuanto danjo e pensamentonan ey ta causando, pero una bes hende ta pone Dios un banda y hisa e carga di mundo pone riba nan cabes e consecuencia ta duro pa e hende.
Hesus a bisa bin serca mi tur cu ta cansa y carga, esaki no ta conta solamente pa hende grandi, pero mucha tambe, pa hubentud tambe, pasobra e enemigo no ta respeta edad, pesey nos como mayor mester guia nos yuinan den caminda di Dios, pasobra diabel ta loer, y pica tambe ta loer.
No solamente nos mester educa nos yuinan, cu palabra y disiplina , pero nos bida como mayor mester ta un ehempel bibo di locual nos ta bisa nan y sinja nan , pa no solamente nan scucha palabra, pero nan mira den nos como mayor hechonan cu ta honra Dios, y cu ta expresa nos amor na nan.
Tin cosnan cu nos mester tene cuenta cune como mayor, pasobra e laso familiar ta laso delicado, cu masha liher por wordo herida, y cu un caminda un trauma ta keda, y nunca nos no sa, cu locual cu a pasa hopi anja atras , por duna un fruta negativo awe, pasobra un hende den famia a keda herida, e a mira, tende of experiencia algo cu e no por lubida, pesey nos como mayor nos bida mester ta honra Dios.
Hebreonan 13:4 ta bisa: Laga matrimonio wordo honra pa tur hende,laga e cama matrimonial ta sin mancha,pasobra Dios lo husga e fornicador y adulteronan. Laga boso karakter ta liber di amor pa placa y sea contento cu loke boso tin: Pasobra E mes a bisa,Nunca lo mi bandona bo,y nunca lo mi laga bo desampara.
E consecuencia di adulterio, maltrato , divorcio, etc , no ta algo chikito, no ta djis un temporada di separacion, pero ta algo cu ta keda tin su efecto riba e famia, pasobra ora un matrimonio wordo kibra algo santo y sagrado di Dios, a wordo viola, pasobra matrimonio ta entre e homber , e muher y Dios, Pesey no mester haci wega cu matrmonio di ningun forma, pasobra tin consecuencia awe y mayan.
Nos yuinan ta regalo di Dios,fruta di barica ta un recompensa, ( Salomo 127:3), nan tey pa wordo educa , stima y guia den bon caminda, pasobra esey ta nos deber como mayor, y e ta un mandato di Dios.( Salmo 128).
Den Josue 24:15 ta para scirbi: Ami y mi cas lo sirbi Senjor.
Awor awendia cu tempo a bira moderno, no laga ningun hende tin miedo of berguensa di bisa esey, pasobra esey ta realidad di bida, caminda un cas no ta duna honra na Dios y no ta sirbi Senjor e cas ey ta falta di pas y trankilidad.
No wak e grandura di bo cas, ni tampoco con luho bo ta biba, no ta importa si bo tin un mansion, of un apartament of un rancho, wak pa den bo cas e nomber di Dios, ta wordo halsa , den tur cos, pasobra un cas cu ta honra Dios , un famia cu ta honra Dios, ta biba bao di proteccion di Dios, ta biba bao di e hala y sombra di e Altisimo, y nan proteccion , tey tur momento,y tin seguridad.